Iran President Mahmoud Ahmadinejad heh nazi 7 song tunnai Tlawngkainikhat nia ah pom tuar ai Islamic ralkap vum ah harsahnak hleng tuh thula ah ponka sup tuhin ralringhnak pe le suah leh sal tiin Revolutionary Guard lam thuthup in phuang ii.
Tehran khuapui ai laivum huap avai 26hnak laibu tlangzarhhnak program ah a tel hnua ah Islamic ai thunaitu sang ber te hmai ah thil poimawh ze thula umh maan kawi tuhin President in thu dung ii.
Cia meeting ah motor thawn a feh lai takin a hmai ai motor 3 te thawn nong dun tuh loin her ruai ai hmun dang ah a motor heh feh ruai ii. Hetin Foreign Ministry ai inn pakhat ah thurup in hoi teu ai he hmun heh Revolutionary Guards ralkap te pawl in kil ii.
Ahmedinejad in motor in suak veleh a kiltu te pawl ai ralthuam le mi ponthilhnak te pawl khai lang sah sek ii. Cia hnua ah Ahmadinejad heh office pakhat song ah lut ruai ai he heh Hossein Taeb, Intelligence hotu ai office pakhat ii ai inn hnia lam ah umh ii. Hetin nazi 7 dung song thu zawt ai zanlan 11:45 pm ah suah leh ii.
Tun naai ah Ahmedinajad in Iran president thar ril tuh hnak thula ah amah daihhnak tling lo lekhaw tiin hriinghnak bawn ii. Adaihhnak Esfandiar Rahim Mashaei heh tling ruai daih napui candidate i tuhin pom sah lo thu umh zo ii. Hetih i lekhaw amah in khai 2009 kum ah ralkap acozah in dik lo ngaiin election ai vote ru hnak te pawl khai phorh sio tuh ti ii.
info