Father’s Day
2011, June 19 nia heh laivumpui ai kin hmang hnakde Pate Nia World Father’s Day hleng tuh leh hmang tuh lala i sing. Kum siarin hmang de napui zaiman Pate nia hmang I sing tih ngawn lingtlang lo thei I sing. Ciaman Pate nia kin hmang dan leh a suak dan temnio in sik tlang nga sing.
Pate nia bawntuhin a ruat hmasa ber tu heh Sonarasmat Dodd tihnak nupang pakhat ii. Apa heh US ralkap Jackson Smith ii. Ralkap pension hnuaah a nupui thi ai a insang heh amah rori in pha ngai in kilkhawi ii. Insangah nu ber om lo hang man nuber dinhmun leh pa ber dinhmun khai lang fawm in a fate hmuah kilkhawi ii. Ciatin a insang heh Spokane, Washington State ah nuam ngai in khawsa tlang ii.
1909 kum Nute nia ah Nu kin kulzia leh a poizia sermon ngai hnua ah Nute nia a om bang in Pate nia khai bon ve tuhin ruat leh a inhnen leh a khuapui te, a u le nau, a rualpuite leh a hminglin te hmuah hmuah sawm leh Pate nia nai ve tuhin zuam ii. U.S president Woodrow Wilson in khai lungkhim pui ii. Inapui a ngaingai in nei ben lai lo ii. 1972 kum ah President Nixon in Pate nia nai tuhin nemnghet sah ii. Hemi Pate nia nai ai hmangtuhin a ruat hmasa ber tu Dodd heh kum 96 tian nung ai 1978 ah laivum hlum in kumkhua a in ah feh ta ii.
Pate nia ah a hmanghnak pawpar tu Dadelion par hmang de ii. Hemi pawpar tu a kung niam nio ii. Minungte in fon ngah tio de napui thi menma loin nung tento ben ii. Ciaman laivum ah insang pa, fate ai Pa khai heh harsa hnak tamngai tok napui khalkha thih pui menma loin zuam tento, tuar tento, tek tento in fate leh insang a kilkhawi de hnak manin hemi Dadelion pawpar hmang de ii.
U le nau te tun kum 2011 panin te Pate Nia ah na pa hih tu ve lai, na suah hlan pahin nangmah hrangah a tumtah cia hnakte khim ruai ben leh khim thil lo hnakte khai tamngai om tuh ii. Inapui, a thin daih bang khim ta lo in khai a fate iit leh zuam tento in insang leh fate hrang tuar tento tu na Pa hih tu ve lai upat hnak leh songlawi hnak thawn na bentawk nio in lehrul tu ve. Na pa a thi fangin kah li ai a hlan mawi ngai na bawt sah leh tah hnakin a nun laiah napa hrangah na bawn thilhnakte bawt sah tu ve ti’n na sawm ing. Na Pa upat tu lai na san sau tuh ii [ Efe. 6:3].