Kin Ram Democracy Khangso tuhin Sangtute telve hnak
By – Rev. Phun Za Nem
Ram pakhat khanso tuhin a ram mipui te telve hnak khiah a thuipui ber le a kulhnak ber i. A ramsong mipuite khangso hlah lekhaw cia ram khangso ti thil lo I sing. Ciamanin kin ram khai Democracy danin fehpui vivo hangai kin khangso tuh hnakah a ram mipuite kin telve hnak a thupui ber i. A ram mipuite kin ti fangin ramsong ram pua om tute kin veksen in tel tlang liang I sing ai, sangtu mi kin imanin kristiante telve hnak tiin rel tuh I sing.
Ram khangso tuhhnakin a ramsong ram pua om mipuite kin veksen tuanvo I ti sing lai kin sual tuh lo i. Ciami ram pakhat ( kin ram) khangso tuhhnakin a hmasaber a kul hnaktu remhnak leh muanghnak i. Remhnak le muanghnak om lo le khaw khangsohnak na per thil lo i. Remhnak le muanghnak om hnua fangin khangso hnak, pumcawm hnak rongaih ti din pha ngaiin si thil tlang tuh I sing. Remhnak le muanghnak a om hnua fangin ianin lianhnak suak tuhai harsa vansangte bawmhnak te khai om thil ian i. Ciamanin mithiam te in “Ram khangso tihnak tu thil pakhat hnua pakhat a peh pehin cang vivo zom vivo tuhhnak i. Com kio awl kio thil lo I” tiin rel de i.
Ciami ram khangso tuhhnak ah sangtu mite kin tel ve hnaktu kin thinlung put dan, khuaruat dan le kin uncan ziaza ah i. Pathian in thu kin cukhnak khiah Bible songah hmu thil I sing. Bible thu kin cukhnak bangin nung lo, hlun lo le singkhaw zaikomin khai kin khangso tuh lo i. Bible ai kin cukhnak thute khiah ram khangso tuhhnak a hampan pha ber i. Bible songah uktute thu ngai tuih kin tinapui ngai lo I sing. Santehhnak ah tunlaiteng Kalaymyo songah mawtaw laisen nailo tamngai om bial i. Laisen nailo tu uktute linlo in maw thunaitute nawhthuh pe manin maw kin ramsongah lut hnak i. Ciami laisen nailo mawtaw khiah a lai bentein lei ai hmang lianglo i. Laisen nai lo kin ramsongah hmang fangin uktu cozahte ca sunghnak tamngai om i. Mipui in siah khon ai bawnhnak lampui, siah khon ve lo mawtaw tein duhtawkin hmang i. Thunaitute hnenah nawhthuh pe ai nai thil inkhai cozah hnenah siah lut lo manin thil dik thil fel ngawn I lo i. Ciami mawtaw a hmangtu, a laitu khai thil phalo bawn hnakah a teltu ising. Cozahin siah khon ngah loai mipuite ca thil pha tamngai bawn thil lo i. A hnuataberah tu mipui te thotho kin sung i.
Ciatinai kin thinlung put le kin ziaza dikcang le khaw fimthiamhnak, nun cakhnak le pawlkomhnak lamah kin khangso tuh i. “Kumpibawi in dikcang niu in ram uk lekhaw, a ram kho i. Ikhalselai sum le saw ian ruat lekhaw, a ukram hnawm sek tuh ii” tin Pathian thuin kin cuk i. Ciamanin hemi hmunah sangtu mite in dikcang hnak khiah ang ngai le thinso ngai in hmang le hlun tlang tuh ai dikcang lohnak khiah do ngam kin kul i. Dikcang lohnak khai linglo bangin mual liam pui menma le singkhaw a rai hlanah kin ram hnawm tuh lala i. Kin tumtahhnak Dimokrasi khai hleng ben tuh lo ising. “Ruko phiarpui khiah amah lala caa laukul ral i. Thukhanhmun zungah thu dik rel lekhaw cawhkuan tuar tuh i. Thudik rel hlah lekhaw Pathianin awrsiat tuh I”. ( Thuf. 29: 4.24).
Ilekhaw rammite in kin ram khangso tuhhnakah zai bawn ve tuh ising. A hmasaber ah ramsong mi le rampua mi kin veksen ram khangso tuhhnak khiah kin pervo I ti ling ten kin kul i. Na omhmun khua le ram nangmahin rem le bawn loin aisu in khai na bawtsah tuh lo i. Kinte kin sanghnak Pathian khian mania, tun nia le thaininghla a thleng awnglo mi Pathian nung bia le sang kin imanin kin sanghnak khai thleng lo ai sanghnak nung thawnin kin ram ca per ten nga sing. Ramsong ram puaah dik lo hnak rel ngam, phuang ngam tuh le dikhnak thawn per tlang le sing khaw kin ram khangso tuh i.
Ciatihai thinlung lam le khuaruah dan, nuncan ziaza te khangso hnuaah kin ram songah fim zir hmun te, sizung te leh mipui kongkawi dan training te tamngai nai nga sing khaw kin ram khang so tuh i. Sum le saw lek heh khangso hnak ilo i. Sum le saw lek ian ai khangso tu minung siatral hnak i. Kin ram kin miphun khangso vet uh kin daih man relde napui a per ngaingai aisu om lailo kin bang i. Mite bangin khangso kin hiam ve lekhaw per peupeu nga sing. Sum le saw lam I loin nuncan ziaza, thinlung khuaruah dan le thu dik thawn khang tek nga sing. Ciami ciah nangmah rori in bawn ai per na kul i. Pathian in zuk tolh vurvo ai na pe tuh lo i. Pathian hmuifu tiin nuncan ziaza pha helaw tiin na pe tuh lo i. Nangmah rori in zir na kul i.
info