Tundung Canada ram ah ruahti tam ze maan tilian (Flood) in buai roh ii.
June hla song pah Canada ai Alberta ram (province) song ai Calgary khuapui heh he ram ah ruah tam ze in si maan ti lian ii. A khuapui song hmuah heh ti in dim sek ai motor le lampui te pawl pil berh ii. Ruahti tam hlen ai July hla tian in tilian in buai lai ii. Ruahti tlok nawn lo hnua ah khai a khuasong le inn hnua lam ah a dim in umhnak ti heh a lon tuh hnak ah roh ngaiin buai leh ii. Ti lon hnak tuhin $170 million bo kul tiin phuang ii.
Zuk: Calgary khuapui ti in dim
Tilian maan inn le lo paai sek, motor te laan sek te pawl tampui umh ii. Calgary in ramsa kilkhawl hmun (Calgary Zoo) khai tilian in hnawm ai a bawnhnak tuh $50 million bo kul ii. A ngom ai tilian in a siatsuahhnak heh $256 million man i zo ii. Cen, building inn tam ngai khai ti in hnawm ruai maan inn 100 hnakin tam sawn heh bal sekin a thar sa kul dinhmun ah cang kio ii. He heh Canada tluanthu ah kum tam ngai hnua ah a roh ber tilian tlunghnak ii.
Hetin Calgary ah tilian tlung ai a buai tlang lei teng ah Canada ram ah khuapui ber pakhat Toronto, Ontario province ai khuapui ah July hla zarh 1 hnak song ah hlivua le ruahti tam ngai hleng vut ai tilian in buai ii. Toronto ah luthnak tlangleng te khai tilian in pil pan ai thunaitu te pawl in tlangleng song ai mipui te pawl heh o man ii.
Zuk: Toronto khuapui ti in dim
Toronto khuapui song ai laihnia tlangleng te pawl khai ti in phim berh ai, a khuapui song ai lampui te pawl khai ti in dim le motor te pawl pil lianglo ii. He tilian in Toronto ai maitha (electricity) hnawm ruai ai maisa nai loin thim berh le a mipui te buai tlang roh teng ii.
info