[portfolio_slideshow]
26 August 2013 nia, India ram nazi 6:30 pm ah Pu R.W Ro Za Thang in Aizawl ai Civil Hospital ah urhnawm tuar loin mual liam ii. A thi fangin kum 63 ii ai, a nupui Tha Nei Kil thawn fapa pahnih nai ii.
Pu Ro Za Thang heh Pu Hlei Sin le Pi Mang Hngel te ai fapa ii ai Laitlang ai Khawlai khua ah suak ii. India ram a umh hnua ah UNO ai meeting ah India ram hming Suan Tung Parte @ S.T Parte hmingin tel de ii. Yangong (Rangoon) University in Master degree (Philosophy) heh cia lai ah ngah har roh hnak ngah awng ai cai hnua ah 1980 – 1988 kum tian Rangoon University ah Lecturer per awng ii. 1981-1983 kum le 1985-1986 kum ah Rangoon ai Calai le Nunphung Committee ah hotu i awng ii. 1977-1979 kum tian Universities Christian Fellowship (UCF) ah E.C per awng ii. Kawlram ai Chin radio program ah 1977-1980 tian radio thuphuangtu ah per ii ai Chil Welfare Association ah 1982-1985 tian hotu i awng ii.
8.8.1988 kum ah Kawlram huap in ram buai fangin 8888 buaihnak ah Chin National Union thawn pehzomhnak ah pervo lang ai Kawlram politics ah a so ze hnak maan 2 Nov, 1988 kum ah Rangoon University Lecturer a i hnak in com ruaihnak tuar ii. Cetin February 25, 1990 kum ah Mizoram (India) ah tlan ii.
India ram a umh song ah Nu Tha Nei Kil (Zahau mi, Thipcang khua) thawn nai dun ai fapa pahnih Jubal ________le Lalfakawm (Fakte) nai ii. Ram le miphun ca a caan bohnak le a buaihnak maan a innsang ah khekdunhnak suai ai, a thih thian a nufa thawn umh kawm lo ii.
India ram a umh song ah Delhi ai rampua Kawlram acozah NCGUB ah hotu ah i awng ai cia hnua ah Chin Liberation Council (CLC), Zo Re-unification Organization (ZORO), United Zo Indigenious People (UZIP), Zo Human Rights Global Networks (ZOHRGN) le Mizoram ai dinhnak Burma Campaign for Democracy le Falam Unity Trust (FUT) pawlkom te pawl ah hotu i awng ii.
India ram ah Pu Ro Za Thang a nung lai ah Chin, Mizo le Manipur ram karlak ah thil pha poimawh rohroh a bawnhnak te umh ii. Cia te songin:
1) Zomi-Kuki War (1997-1998)
He buaihnak heh Manipur ai Paite le Kuki karlak thubuai ii le roh ngaiin ral tho in tawng dun au mi tam ngai thi awng ii. He buaihnak ah India acozah lam rolh thil lo ai Mizoram lam sawn ai Zo Reunification Organization (ZORO) in a karlak ah palai per sah awng ii. Cia palai te song ah konghoitu ber le, Zomi le Kuki upa te tawkdun thil tuhin ralpha ngaiin Meeting kotu le thubawn tu ber heh ZORO lam in Secretary General Pu Ro Za Thang (Suan Tung Parte) i awng ii. Pu Ro heh cia meeting record le history ah a lar in umh lo ii. Cia thubuai record ah Pu Ro Za Thang tu Kawlram mi i maanin le India citizen ngai ngai i lo thawn Meeting record ah tel tuh mawi lo maan tel lo ii. Zanniat mi in hetih bang ai thisan suak ralthohnak rem bentu mi upa le mithiam kin naihsun pakhat ii.
http://en.wikipedia.org/wiki/
2) Burmese Eviction in Mizoram 2003-2004
2003 kum ah Aizawl ai Vancy Hotel ah nupang niu pakhat heh pasal in 1 sualpui ai cia thu heh Kawlram pa tiin thang ai ui le aar bangin Mizoram an Kawlram mi kin hnawt ber awng ii. He teng fangin Pu Ro Za Thang heh Geneva, Switzerland ah UN meeting kai lai teng ii. Switzerland in a tlung lam ah Mizoram in Kawlram ah tlung thil lo Chin mi tam ngai heh Vawmbuk le Sihhmui khua hiang ah Refugee Camp dinh in umh ai YMA thawn a buai roh lai teng ii. He refugee camp 2 heh India acozah ih daih lo napui Pu Ro Za Thang in Delhi ai UNHCR thawn naperdun Human Rights and Law Network (HRLN), mi tam sawn in Social Legal Information Centre (SLIC) tiin a linghnak office te sawm le HRLN ai Exe. Director Colin Gonsalve le a upui rori Mizoram ah Documentation bawn in kawi awng ii. Cetin HRLN thawn naper tlang in Sihhmui camp ai te Delhi ah feh hmasa ai cia hnua ah mi tam sawn umhnak Vawmbuk Camp ai te pawl heh Delhi ah hleng ai Refugee ngen tlang ii. Vawmbuk Camp ah Zanniat mi tam ngai tel ai Delhi ah Refugee in Zanniat tam ngai a hleng tlanghnak ber hmasa ber khai cang fawm ii. Tun heh Vawmbuk Refugee Camp thula in Zanniat mi tam ngai Western, Europe le Australia lam ah hleng lianglo zo ii. Vawmbuk Camp thula rin ruat hal nawn lo Zanniat mi tam ngai umh tuh hang ii.
Pu Ro Za Thang thula website dang ai siar pha te pawl:
http://www.zomidc.org/minamtaangthujpaupu.htm
http://en.wikipedia.org/wiki/Kuki%E2%80%93Zomi_Ethnic_Clash_1997%E2%80%9398
http://www.mandint.org/pages_fr/geolocalisation_delegues/0618.html
info