Jan, 2009 kum pah suahhnak

Zanniat Auaw

Suahtu:

Zanniat Youth Organization-Zanniat Mino Pawlkom

(ZYO-ZMP)

Phone :

Aizawl:               0091-9436788991

Delhi:                   0091-9910961894

Malaysia:        0060-162053718

Thufim 18:15 “Khuaruat mi te in thu ling beet ai mifim te in thu ling zuam i”

======================================

Kin Thuanthun le kin dinhmun

– Salai Tluang Kip Thang, Zanniat Laizo

Kum 100 rin nung thai lo minung kin i maanin kin nung song niu ah tunhlan ai laivum ah thil hlenghnak te le thula umdaan te ling lo le singkhaw kinmah san ah le hnawta ah poi roh thai i. Minung te in siar thil tuhin Holy Bible um lo ta selai kin poi roh tuh i. Cia bang pah miphun le ram thula khai tunhlan ai thula te ling lo le singkhaw kin hmailam lamkhong le kin tefa te ca tian poi roh thai i.

Miphun le rammi ihnak nai lo minung um lo i sing. Mi khua mi ram ah nung thil tuhin amah te rammi ihnak tian lang de i sing. Laivum ai ram khangso te khiah tunhlan ai mi te in harsahnak le buaihnak tam ngai thawn amah te ram le miphun khiah khangso ruai maanin i.

Tun kin dinhmun siik leh fangin Zanniat te tu kin paai, kin dinhmun niam, mi lak tel ben lo tiin mi tam ngai in reel hang i sing. Mi te mithmai siik kongin le mi te konghoihnak hnia ah um kin tam sawn i hang. Kin pon, laai le laa te zai nam loin umh i hang sing. Mi te lakah hmai nor tuh ngam lo kin tam sawn i hang.

Tunhlan ai kin pipu Zanniat te dinhmun le tun ai kin dinhmun te ruat tlang nga sing.

Tun hlan ai kin dinhmun:

Chinram song ai um te heh Chin tiin ko i. A song ai um te in hming dangdang in ko dun i sing. Kin in Laimi tiin ko i sing. Laimi song ah kin heh Zanniat i sing. Laimi heh tun hlan ah China (Taluk) ram an vaai te tiin miphun dang te in ling thil i. Kin pupui te khiah tun ai Kawlram an Laitlang ah vaai le cetin India ram lam tian vaai tian vaai i tiin mithiam te hnen an ling thil i sing.

Kin Zanniat te heh mi pakhat Zanniat tihnak pa ai tefa songin suak te i tiin kin pipu te hnen an ling thil i sing. Zanniat tefa tein a papui ber Zanniat hai tuh loin a fate umhmun khuaram khiah Zanniat Ram tiin ko le he dung heh 1600 AD kum dung i thu nganhnak um i.

Tun nia tian Zanniat thuanthu heh famkhim ngaiin laai ah siarpha nai ben lo i sing. Inapui khaw kin pipu le thuanthu lingtu te hnen an kin ling thilhnak te hlir leh fangin Zanniat mi heh miphun dang te kut roh ngaiin tuartu miphun i sing. Laimi heh tun hlan ah do dun tio ai a nehtu miphun hnia ah um de i. Zanniat ram khai saklam ai Sihzang (Siyin) miphun te in kin sim de le kin nupang te khiah amah te nupui tuhin Sihzang ram ah tlun de i. Hetin tun nia tian Sihzang miphun song ah Zanniat mi tam ngai um ai Zanniat pon thiam loin Sihzang miphun cang lio Zanniat mi (Ahlai ce in Lunghawh mi) tam ngai um i. Sihzang te in Zanniat te kin sim de le Sal ah kin lang de napui kin uk de lo i. Hetin kum rai thah Zanniat ram in Sihzang raal tuar de napui 1948 kum ah Voklak khua, Sihzang ram ah Sihzang te in Zanniat ram song ai khuabawi te ko liang le ngaithiam ngenhnak bawn i. Cetin Zanniat le Sihzang karlak ah remhnak um leh i.

Zanniat in Sihzang raal tuar hnua ah Run (Manipuri River) tipui ral ai Phalam/Falam (Tlaisun/Taisun/Tashon) miphun te in 19810 kum dung ah Zanniat ram ai Khualai Tlangriat (Khualei, Lumbang, Zultu, Khuatluk, Zawl Hlang, Tlukkhan, Khanram, le Hlimhlang) sim le Zanniat ram heh Taisun ukhnak hnia ah 1910 kum tian (Kum 100 dung) um awng i.

Tunhlan ah Hakha miphun khiah  thunai ber i awng i. Hakha heh Sunthla le Tlaisun thawn do dun leh ai a ngom ah tu Sunthla le Tlaisun in neh sawn de napui Hakha Miuk Lian Nawn san ah Hakha in neh lio ai raaltlaan in um  awng i. Hetin Hakha hnia ah Tlaisun heh um leh awng i. Inapui Tlaisun in a khuapui Tlaisun khiah Balai hmun ah thawn le, a khua thar hming heh Falam tiin din leh i. Hetin Tlaisun in ram uk leh tuh daan a thar bawn le British (Mirang) te in Tlaisun Democratic Council tiin ko sah i (Stevenson 1943:213). Tlaisun Democratic Council in Zanniat ram, Sihzang ram le Sokte ram tian in uk liang ben i. Inapui Hakha le Zahau tu Tlaisun in neh lo maanin uk ngah lo i. 1895 kum ah Chin ram pumpui heh British hnia ah um i.

Zanniat miuk Lumbang mi Lian Awng le Naih Vum te in British te hnen ah roh ngaiin tong awnghnak maanin Zanniat te heh Tlaisun hnia an 1910 kum ah luat awng i.

British te in Chin ram a lang fangin Sihzang ram ah Camp din le Fort White tiin ko i. 1892 kum ah Sihzang te in British raalkaap bawi General White heh hnawta ah reek sah maanin British in Headquarter heh Falam ah thawn i. Hetin Falam heh Chin Hills District khawpui (Capital) ah cang i. He teng ai Chin Hills District song ah Tedim, Falam le Hakha Disctict te tel sek i. Chin Hills Battalion khai Falam ah dah i.

British in Chinram uk hlan pah Tlaisun Democratic Council um zo i. British te in Chin-ram uk hnua ah Miuk daan lon le Chin Hills Regulation hmangin Circle Ukdaan (Circle Administration) hmang ai 1896 kum pah kin uk maanin Tlaisun Democratic Council tihnak khiah paai ruai le 1919  kum dung tian Miuk daan hmang loin kin uk i. Inapui Circle san ah Zanniat ram heh Tlaisun miuk hnia ah um i maanin Zanniat in Tlaisun hnen ah Lukhawng le Siah te pe tio pah i. 1906 AD ah Zanniat in Phalam (Taisun) hnen ah pe tio de hnak Lukhawng luat le 1910 AD ah Siah luat i.

1948 kum, February 20 nia ah Chin upa tam ngai ko dun le ukdaan thar reel tlang ai hlan daan hlum tuhin le Democracy daan bangin ram uk tuhin lungkhim tlang i. He nia heh Chin National Day tiin ko i. He nia ah Chin ram heh Hakha, Falam, Thlantlang, Tidim, Mindat, Matupi, Paletwa le Kanpalet tiin khen tlang i. Hetin Zanniat heh Falam ukhnak song ah Kawlram in Independence (Zalenhnak) a ngah hnua tian in umh i sing.

British in Laitlang uk fangin Laimi te heh mah miphun teen in ram ukhnak nai cia bangin amah te san ah a umcia Miuk le Khuabawi te hmangin uk i. Burma-ram (Kawlram) in 1948 kum ah Independence (Zalenhnak) ngah fangin British te in kin hlumhnak ukdun daan bangin acozah in fehpui zianzo i. British te um lo ta selai Zanniat heh Tlaisun hnia ah um tuh hlen tihnak i. British te in Chinram lo uk lo ta selai Chinram pum heh Tlaisun in uk thai i tiin mithiam te in reel de i (Z. Sakhong, 1983; Vumson 1986: 103).

Falam song ah Zanniat mi le ram:

Falam (Phalam) peng song ah Zanniat ram heh Run tipui an nisuakhnak lam Sagaing division tian i. Tunhlan ah Kalay hmunrawn ram ah Zanniat mi in khuatohnak khua tam ngai um napui acozah in Chin state song ah kin thun sah lo maanin tun kin san ah Zanniat ram ti thil lo i sing.

Chin state song ah District 2,Falam le Hakha District umh i. District 2 song ah Township 9 umh i. Kin Zanniat heh Falam Township song ah umh i sing.

Chin State map (Ramzuk) siik fangin Falam township heh ciik niu i. Inapui khaw Township dang te hnakin a tumce hnak tam ngai umhhnak songin:

1)  Miphun tam ngai

2)  Pon (Language/Dialect) tam roh

3)  Khua hming hmangin ukhnak ram i.

Township dang te siik fangin a tlangpui in tunhlan ai amah te ram le miphun ukdunhnak le pon bangin umh tlang i. Falam township tu Falam tifangin khua hming i.  Falam peng in hmang ber hnak Laizo pon khiah Chin state in hmang tuhin British te tian in daih sah awng i. Laizo pon tiin kohnak  heh Falam pon tiin thleng napui he pon heh Falam township song ai um miphun veksen ai pon i lo i. Miphun bang dun lo le pon bang lo maanin thinlung hmun khat thil lo hnak tam ngai umh de i. Tun hlan ah Taisun san lai ah Falam heh hmingthang roh ai British te tian in Chin ram pumpui ukhnak hmun ah hmang le Kawlram in Indepdence ngah hnua ah Chinram heh State ngah fangin State khuapui (Capital) i awng i.

Hetih bang ai Falam hming thang roh awng napui hnawta ah mah miphun niu in khangso tlang leh fangin Falam peng heh peng dang le Chin miphun dang te lak ah a dinhmun niam tete i hang.

Zaimaan hetih bang ai lungrual thil lo i tihnak a hampui siik fangin miphun bangdun lo, pon bangdun lo te um bial maanin i. Falam tihnak a hampanhnak ngaingai tu Phalam/Taisun/Tlaisun i napui Tlaisun pon heh Falam peng veksen in hmanghnak pon i lo ai Laizo pon sawn heh Falam pon ah cang i. Hetin Falam tihnak heh miphun i lo maanin Falam peng song ai um miphun te in amah te pon le miphun heh cawisang hiamhnak thinlung nai tlang sek maanin Falam peng heh khangso thil lo i.

Laizo/Falam pon thawn a nong ber miphun te siik fangin Zahau, Sim, Laizo, Hlawnceu le Hualngo te heh pon ah nong dun roh i. Inapui khaw Laizo/Falam pon thawn bang dun lo miphun dang te umh bial i sing. Falam pon hmang lo miphun te lak ah a tam ber heh Zanniat mi i.

Falam township song ai umh miphun te lak ah Zanniat heh ram kau ber naitu i. Zanniat ram heh Chindwin hmunrawn (Chindwin Valley/Kalay-Kabaw) thawn a nong ber i. Laitlang le Kawlram pui pehzomhnak ah poimawh roh i. Tii le thing pha tam ngai umh hmun leek i lo ai lailung song thil manpha te khai umh tiin mithiam te in reel de hnak ram i. Chin thuanthu ah Falam peng song ai mithiam le milar te heh Zanniat mi tam ber i.

Falam Township ram le lailung umdaan siik fangin Zanniat ram le Laizo/Falam pon hmang miphun te heh Run Tipui (Manipuri River) in kin khan cia i. British san lai pah Zanniat miuk te in Run tii kaan in mi khua le ram uk hiam lo i. Mi ram le mi thilri ot lo le lang hiam lo hnak heh Zanniat te thinlung ah tel ngio i.

Tun kin Dinhmun:

Kawlram in Independence hnua ah Falam peng song ah Zanniat heh:

1)  Ram kau ber naitu

2)  Christian lang hmasa ber tu

3)  Laaithiam le mithiam, milar suak hmasa ber

4)  Ramdang ah umh hmasa ber

5)  Holy Bible le Tonic Solfa laabu nai hmasa ber miphun i sing.

Tun Kawlram (Burma) buaihnak hlir fangin Democracy umh lo maanin tun nia tian kin buai tlang i. Democracy zalenhnak daih tlang i sing. Cia lak ah ram pua hleng napui Democracy bangin mah miphun khangso tuh le konghoi dun tuh lingthiam lo le lungkhim ben lo kin tam roh pah i.

Mite ukhnak le thuhnia ah um lo ai, mah niuin zalen ngaiin le kihzah dun hnak thawn um tlang tuh heh kin poimawh ngai i. Khangthar niunawn te le khuaruat ben veksen in kin dinhmun hlir lehin rem kin cu i.

Zanniat mi kin ihnak, laivum ah kin naihsun Zanniat ram, kin pon, kin laa le kin miphun heh tun pahin kilkhawl tuhin Zanniat mi veksen ca pervo i. Miphun dang te in kin ruat sah tuh lo i, amah te miphun le ram khangso tuh daih tlang sawn i.

Kin thuanthu hlir leh fangin British te in kin uk hlan ah miphun dang hnia ah umh cia i sing. British san ah miphun dang te hmangin kin uk pah i. Kawlram in Independence a ngah hnua ah Kawl le miphun dang te hnia ah um pah i sing. Zanniat te kin dinhmun tu tunhlan pah tun nia tian mi kut hnia umh te miphun i sing tiin reel sing lai sang lo tu tam roh um tuh i sing. Mi kut hnia ai umh kin i cia maanin kon ram ah kin hlengin khai mi te mithmai siik kongin umh kin tam ber i. He heh Zanniat mi ihnak tuh hrimhrim i ni maw, tiin khuaruat pha umh bial i.

Dikcanghnak le khuazuamhnak thawn um nga sing. Kin khangso tu seh.

Laai rawnhnak te:

1)   Lumbang Ram Mawi le Zanniat Tluanthu by Za Thluai

2)   In Search of Chin Identity: Lian H Sakhong

3)   In Search of Chin Identity Review by Dr. Vum Sawn

4)   The Zo people of Bangladesh, Burma and India by Thang Za Dal

5)   Ciinrungsuak Ciin (Chin) Miphun by Thla Tin Thang

6)   Wikipedia the free Encyclopedia www.wikipedia.org

~~~~~~~~~~~~~~~~

Zanniat ramsong Tlawngta umzat

(Falam Township, Chin State)

Khua                 Tlawngta  Tlawng

1.   Lumbang           337           HS

2.   Khawlei              27

3.   Zultu                  27

4.   Khumzing          26

5.   Simcing             4

6.   Meihol               1

7.   Lumte                75            MS

8.   Cong Kua          11

9.   Locom               40

10. Tlangphai           9

11. Hmun Li             14

12. Lian Rih             24

13. Tlor Zan             16

14. Za Tual              45

15. Webula              177             MS

16. Za Lang             36

17.   Ralom      21

18. Kim Miang         3

19. Pamunchaung    34

20. Falam                100

Veksen kom      1037

HS=High School; MS=Middle School

~~~~~~~~~~~~~~~~

Dentist tlawngta kin naihsun

Hming  : No Nai Thang

@ Naw Naw

NRC                : 5/kalatha ( N )- 221234

ID                    : nawnaw1998@gmail.com

Pa Hming         : Kap Phun Lian [Pa Bo ]

Nu Hming        : Daw Ngun Za Thuai

Kum                 : 20

Zirhnak : Dentist, Mandalay

(2nd year)

Om Hmun       :Pyinkhonegyi village, Kalay Township, Sagaing Division, Burma

2008 kum ah Dentist zir pan ii. 2009 kum ahtu sum leh pai harsa man zir loin na hlawh ii.  2010 kum ah Second year zir lai tak ii. March 2011 panin ZYO-ZMP tein a tlawngkai hnak tuh Ks. 50000/- in bawm pan ii. Kin ben tawk leh kin sian tawk in kin Zanniat mino zir ben vetuh hnak bawm ten nga sing. Sawngen hnak thawn talin khai bawm nga sing.

~~~~~~~~~~~~~~~~

Solomon vingpui siik thil hang

Tunhlan kum 3000 dung ai Israel siangpahrang hmingthang Solomon in sahnak vingpui heh mipui in siik thil tuhin hong hang i. Jerusalem khuapui hlun song ah um i. 1970 kum pah lai hnia ah tawk pan le tun fangin fiang ngaiin co suak i. Bible sanglotu te in Siangpahrang David le Solomon heh um ngaingai lo bangin reel de napui tun bangin hlan thilri te tawk fangin fiang ruai i.

~~~~~~~~~~~~~~~~

Ttongtthik (Maihol) Khua ah Pipe in Tii Hleng

June 18, 2011: Itt hnak u le nau veksen…

Kin Zanniat Run inn pui songin hnuk ning sat tlang ing. 6 May, 2011 – 11 June, 2011 song hmuah ramsong lam ah sultluang lamtluang neu ai naper ben ai i umhhmun Aizawl hleng leh zo ing. Ram le Miphun ca naperpui te ning veksen ning ngai lawlaw ing.

Tunteng dinhum ah Maihol khua heh Tii lam harsa ngai i. Zaiman ti fangin UNDP te in bawmhnak pe thil velo hmun khua i le Zanniat Ram song ai khualtlawn sukso vak te ca khai cawlawm tamber hmun khai i le khualsi te ca, rikaam tihaal te ca, harsahnak tawk de hmun khua i. Cia i maan Pathian in mite thinlung song ah naper ai Ram song ram pua lam in i tu seh, hemi khua ca tuh tin mah hrang din/aih tuh neu sup ttento ai Tii a hlengthilhnak tuhin khuazuam ngaiin ruat tlang ai, Kawlram tangka in Ks. 4,250,000/- khim ben ai 1.6 miles (Peng) hla Tii lang ai tun dinhmun ah mah inn tten ah Tii hleng thil zo i hang. Hemi Tii hleng thilhnak tuhin Zanniat Youth Organization-Zanniat Mino Pawlkom (ZYO-ZMP) te in ramsong ai mi te thawn pervo lang  tlang hnak i. Sumpai, Thangzang, Ruahhnak le kuulsamhnak hmuahhmuah a pertu, a tawlreltu te vum ah cung Pathin in a thar in hmuifu ning lo pet tu tten selaw.

Sumpai kin bawmtu te……..

1.  Pa Kap Khuah le Nu Tuah Hngel te Innsang

(Ottawa City, Canada)

2.  Pa Luai Bik le Nu Bawi Hnem te Innsang

(Battle Creek City, USA)

3.  Pa Thian Ro Uk Lian le Nu Ngun Nei Thluai te Innsang

(Kualalumpur, Malaysia)

4.  Pa Ngun Lian Mawi le Nu Sung Hlen te Innsang

(Borkenes City, Norway)

5.  Pa Ro Uk Lian le Nu Sung Hnem te Innsang

(Okhahoma City, USA)

6.  Pa Thawm Nai Mang le Nu Biak Kil te Innsang

(Ottawa City, Canada)

7.  Pa Thawng Za Khen le Nu Zung Bawi te Innsang

(Ottawa City, Canada)

8.  Pa Dam Za Mang le Nu Sui Nuam te Innsang

(Ottawa City, Canada)

9.  Fenu Sui Hnem Mawi (Ottawa City, Canada)

10.       Pa Biak Phun Sang le Nu Cung Hlawn Khim te Innsang (Battle Creek City, USA)

11.       Pa Khur Ci le Nu Don Siah te Innsang

(Taungphila, Kalaymyo, Sagaing Div., Burma)

12.Pa Ceu Ling le Nu Hrin Mawi te Innsang

(Taungphila, Kalaymyo, Sagaing Div., Burma)

te pawlin sumpai lam in kin bawn tlang hnak i. Sumpai in i tuseh thazang le ruahhnak in i tuseh, a pan in a ben tian persuahhnak vum ah cung Pathian in hmuifu ning lo petu selaw..

Kin khua, kin ram, kin Miphun khangso tuh ve hnak tuhin naper pha tamngai nai lai i sing khaw…….A thu leek reel menma kin cu lo i khaw, mi khua le ram te khangso kin khel sek hang i khaw. Kin thazang le fimthiamhnak te suah tlangin Pathian in kin pehnak, kin khua, kin ram, kin miphun ca zai per ve nga si???? Pawlkom kin naihnak ZYO-ZMP te in naper tlang tuhin na iang hlen i khaw.

Anghnak tampui thawn,

Ram le Miphun caa,

Ning naperpui,

Zam Luai Thang, Aizaw.l.

Ph:       +91-9436788991,

+91 9774637246

~~~~~~~~~~~~~~~~

Kum 5 Ban Ki-moon in kum 5 per beet tuh

UN ah ram 192 veksen in tun ai UN Secretary General Ban Ki-moon heh kum 5 dang per beet tuhin lungkhim tlang i. 2007 kum ah Sec. Gen. per pan i. Amah heh kum 67 mi i le tunhlan South Korea Foreign Minister i awng i. Ban in Ivory Coast election thula le Middle East or N-Africa ca democracy buaipui hnak tulah ah hming thang ngah i

~~~~~~~~~~~~~~~~

June Hla song Kawlram Thuthang COM

• Tun teng Kachin Independence Army (KIA) le Kawl acozah do dun teng i. Sinbo ah acozah raalkaap 17 thi zo i. Hetin kaap dun teng fangin acozah raalkaap lam in khua song ai Kachin nu le nupang te khiah tam ngai sual le a thi te khai um bial le mipa te kha reek menma de i.. Acozah raalkap umhmun hiang ah he bang heh mipui in tam roh tuar teng i.
• 21 June nia ah Shan State Army (SSA) le Acozah raalkaap te kaap dun i. Acozah lam in SSA ram song lut maanin i. Acozah lam in a tlawm ber ah raalkap battalion 3 hlat i. Neypyidaw in SSA hmunpui Wanhai kaap tuhin thu suah zo ti i. Wanhai hiang ah acozah le SSA heh kaap dun tio teng i.
• February hla pah Kawlram acozah thar heh Naypyidaw ah to hnua ah acozah thu lungkhim lo Kachin, Shan le Karen miphun te thawn kaap dun tete. Ramhrin miphun lak ah raalkaap nai tam ber Wa te in khai acozah in kaap loin amah te thawn thu reel tlang sawn tuhin sawm hang i.
• Karen ram ai Three Pagodas Pass hmun ah Jun 14 nia ah acozah raalkap te kaap tuar maanin harsa tete i.
• India central acozah in Kawlram mi heh ramri an 16 km tian leek lut thil tuhin thu suah zo i. Ramri an 16km lan lekhaw Central acozah hnen ah Permit lang kuul tuh i. Mizoram lam ca Permit heh Mizoram State Foreigners’ Registration Officer te hnen ah lang kuul tuh i. India ram ah daan loin Kawlram mi luut tam tete maanin hetih thu um i.

~~~~~~~~~~~~~~~~

June hla song Laivum Thuthang com

n Mississippi tipui lian ze maanin Gulf of Maxico khiah tii liam tete i. US Geological survey te in tun heh thuanthu ah a roh ber i ti i. 8500 – 9421 square miles tian tiin in dim tuh ti i.

n Australia ai New South Wales ram song hmun 5 heh tiilian le hlivuasia maanin dinhmun lau kuul tiin acozah in phuang i. Cia te tu, The Coffs Harbour, Gloucester, Cessnock, Muswellbrook le Glenn Innes-Severn i.

n NASA setellite Swift Gamma Burt Emission in van ai Black Hole song ah Arsi keh teng lai tawk ngah i. Black Hole song ah Arsi keh maan in tleu phunkhat Gamma Ray heh March ni 24 dung pah tun nia tian roh ngai in suak i. He tleu heh kum 1 song lar tuh tiin mithiam te in phuang i. Scientist te ca Arsi keh/thi teng heh tawk har roh i. Kum 100 million ah vai 1 um thai i. Tun ai Asi keh song an suakhnak tleu heh Arsi tam ngai umhmun Draco  lak songin suak le kin lailung an 4 billion light year dung ah  umh i.

n China ram hlanglam ram ah ruah tam ze in si maanin mi thawng tam ngai in inn le lo hlum i. Innsang 122,400 in umhmun thawn teng i. Yangtze tipui hlanglam heh a roh ber hmun i. Mi 105 thi zo i.

n Iran President Ahmadinejad in nitlakhnak ram te do tuhin tunhlan Soviet ram te le China te sawmhnak phuang i. He thu heh Kazakhstan ah Shanghai Cooperation Organization (SCO) khawmpui ah i. SCO heh 2001 ah din panhnak i, China, Kazakhstan, Kyrgyzstan, Russia, Tajikistan le Uzbekistan ram in din le biakhnak lam ah Central Asia ram ca humhimhnak le lungrualhnak tuhin tumtahhnak i. Hnawta ah Iran, India, Pakistan le Afghanistan ram te in daih ve ai lut ve i.

n 2012 ah laivum bo tuh lau te in French ram ai Bugarach hmun heh a him ber hmun tiin ruat le cuh tlang i. He hmun heh lung naw puipui umhmun i. Laivum ai mi tam ngai in heh hmun heh tlawh ngial i. Mayan Calendar bangin 2012 ah laivum bo tuh tiin um tlang ngial i.

n bin Laden dinhmun awhtu Al-Zawahri in Israel le US do tuhin thu kamhnak bawn zo i. Amah heh Egypt mi i.

n Japan ai Fukushima nuclear maisa ceet puakhnak an nuclear radiation (nuclear daat) suak hlen ai tun hnakin suak tam tuh loin he ceet heh concreate thawn khuh tuh i. 177 feet sang tuh le 154 feet sau tuh i. Tun kum March 12 nia ai hlinhlin tlung maanin heh ceet heh kilkhawl thil loin umh le Hydrogen Nuclear puak i.

n China in US thiamhnak hmangin Dongfeng-21D missile bawn suak i. US te thiamhnak heh US in daihlohnak ceet thilri te khawm de le cetin missile thiamhnak ngahhnak i. DF-21D in US  ai vanzuang phur raaldohnak lawng kaap ben i. China lak ah US him lo hang i.

n American te in van ai hlivua um lo hmun ah tlanglengtu lailung minung te heh Astronaut tiin ko le Russia te in tu Cosmonaut tiin ko i.

n Chemistry ah hmanghnak Periodic Table ah tel lohnak Alphabet tu J i.

n Rocket vanzuang thar in Paris le Tokyo heh nazi 2.5 song zuang tuh i.

n Tun teng USA in ram 4 ah raal do teng i; Afghanistan, Iraq, Libya, leYemen

n China le Russia in 16 June nia ah Arab ram ai buaihnak thula ah nitlakhnak lam ram te rolh ve tuh loin phuang i. He thula heh US in Syria ram thula ah tel maanin i.

~~~~~~~~~~~~~~~~

Hla siar Zanniat laai siar pha suah thil tuhin bawmdun nga sing.

~~~~~~~~~~~~~~~~~~~~~~~~~~~~~~~~~~~~~~~~~~~~~~~~~