Tun nai hlivuasia man Phillipines ram in tuarhnak heh USA acozah in roh ngai in bawm ii. Helicopter mawngtu (Pilot), Mathew Stafford in Borongan khua ah helicopter thawn tum fangin khuanu khuapa tam ngai in lo cang ai, fang leh ti te langtuh in kawibial ii. Naupang te ca cihlum te khai keng bial ii. He mi helicopter heh USS George Washing raldo lawngpui an phurhnak ii.
Philippines ram tikhulh, Leyte leh Samar khuate ah khai US Navy ralkap ten bawmhnak tam ngai pe ai, khuanu khuapa te lungawi ngai ii. Tih bang te ai US Ralkap te in bawmhnak te ah roh ngaiin naperhnak heh USA acozah in Asia hmun lamah a thunaihnak leh a telvehnak daak ruaitu i ai, USA acozah ai thunaihnak zaitian i ti khai fianruai ii.
Phillipines ram in tuarhnak man Pinoy te heh a hiang a um ram te in khai lo bawm lianglo ii. Australia, Indonesia, Japan, Malaysia, Singapore, South Korea, leh Taiwan ram te in bawmhnak te pe zianzo ai, Brunei, Great Britain, New Zealand, leh Thailand te in khai pe tuh thu phuang zo ii. Inapui USA acozah ai bawmhnak tu khum ben cuang lo ii. China in ralkap hmang ai bawmhnak zai khai pe lo ai, sumpai tem neu lek in bawm lai ii.
Philippines ram in hlivuasia a tuar ti ling ve leh Japan ram ai US Marines te in bawmhnak pe tuh leh kulsamhnak te bawmtuh in fehsuak ii. Ni rai lo neu ah USS George Washing Raldo lawngpui khai Hong Kong in araldo vanzuang te thawn Phillippines lam pan in feh suak ai, Phillipines a hleng fangin tu US Air Force te in bawmhnak ca na lo per pan zo ii. US acozah in vanzuang 186 hmangin Bawmhnak ca napertutuh minung 1200 phur ai Tacloban khua ah thum ii. He mi khua an minung 2900 val te heh hmunhimhnak sawn ah thawn sah ii. Phillippines ram tipui hiangah US ralkap 600 um teng ai, USS George Washington Raldo lawngpui ah ralkap 6200 te in tawlrelpui ai, 31st Marine Expeditionary Unit ai ralkap 1000 heh tun zarh songah hleng tuh fawn ii.
Col. Miquel Okol, Phillipines Air Force thuphuangtu in tih bang ai USA leh Phillippines ralkap ten a tak rori in raltawng lek ilo tunah tu napertlang duhdaan leh a kulhnak te atak in Operation bawn thil hang i sing. USA leh Phillipines ralkap te ca naper tlangdunhnak thupui ngai ah cang ii.
(Source – The Epochtimes)
info