Kawlram democracy ca party lam in a zuamtu mi lar U Win Tin heh April 2, 2014 nia ah ah kum 84 mi in thi ii.
Win Tin heh National League for Democracy (NLD) party dinhtu te lak ah tel ii. Cia lai ah kum rai ngai thuthang le thula lam ngantu i zo ai ralkap acozah dik lo thu te a nganhnak in lar roh ii. 2011 kum ah Kawlram ah acozah thar ding fangin ralkap in acozah vum ah thu a naihnak te pawl a lungkhim lo thu te pawl heh ralpha ngaiin phuangngamtu mi tlawm niu song ah Win Tin tel ve ii. Kum rai ngai amah thawng tohtu ralkap thotho in acozah thar ah thu nai hlen hnak a dik lo thu te pawl phuangtu ii.
Win Tin heh Kawlram ah ralkap acozah in politics maanin thawng a tohhnak mi lak ah kum rai ber a taangtu lak ah tel ii. 1989 kum an kum 20 dung thawngto ii. Pom a tuarhnak san ber tu NLD party dinh maanin le United Nations ah Kawlram acozah in minung dikhnak le covo a siatsuahdan te pawl phuang a tumhnak te maanin ii.
“Ni 7,000 thawngto ing, i nunhnak hmun 4 ai 1 tu thawnginn ah i caan bo zo ii. Thinhnawm kul ze ii.” tiin Win Tin in a thawngto lai thula a nganhnak laaibu “Man-made Hell” tihnak ah thawng a to lai ai harsa a tuarhnak te pawl a nganhnak ah tel ii.
2008 kum ah thawnginn in suah ai cia lai ah kum 78 mi i hang ai a nun cak lo maanin hospital (sikhaan) ah feh kul tio in umh ii. Tunnai ah amah heh Rangoon General Hospital ah a haihawh lam le eel urhnak te maan in lut ii. Cetin doctor in Tlawngkainikhat nia ah a nuncaklohnak phun tam ngai maanin tuar ben loin a haihawh umh nawn lo thu phuang ii.
Win Tin heh kum 30 dung laaingantu (journalist) in umh ai 1988 kum ah NLD party dintu mi 9 te song ah tel ii. Politician ti loin jourlist ti tuh sawn in Win Tin in a daihhnak rel ii.
Win Tin in Win Tin Foundation tihnak 2012 kum ah dinh ai tunhlan ai politics in thawngto te pawl bawmhnak tu le thuthang le thula ngantu te pawl ca sumsaw harsa te pawl bawmhnak tuhin dinh ii. Nikum tian U Win Tin Foundation in sumsaw kyat 90 million (US$90,000) heh mi 300 hnen ah pe zo ai Win Tin daihtu te hnen an nganhnak sumsaw in bawmhnak ii.
Win Tin heh amah tu Khrihfa i napui a innsangnu heh Buddhist ii tiin lingtlanghnak ii.
info