Malaysia ram ai Court sangber (Federal Court) in Allah thu ah thu relcat hnak nai zo ii. Lower Court in thurelcathnak khiah Court Sangber in lungkhim pui ve ii. Court Sangber in Muslim lo te in Allah hmang thil ve lo tin thurelcat ii. Tih bang te man Malaysia ramah biakhnak dang te ca covo tem te te ti daak ruai ii.
Federal Court in thurelcathnak nai hnua ah, acozah lamin thu phuang ve fawn ii. He mi thu relcathnak heh The Herald thuthang Malay pon ai hlathnak thu lek ai relcathnak i thu in phuang ve fawn ii. Acozah lamin Allah tihnak khiah Christian te in biakinn ah khai hmang thil hlen thu phuang fawn ai, thinhnok thai ngai thu ii.
Acozah lamin Allah tihnak khiah Bible lam leh Christian te in thuthang a nganhnak te ah kham tuh leh tuh lo fian ngai in rel lo ii. A liamcia kum ah, Muslim thunaitute’n Christian pawlkom zung an Allah telhnak Bible 300 sutsah ii.
Acozah lamin Allah tihnak khiah Muslim te lekin hmang tuh hnak i thu, Malaysia ram mipum hmun 3 ah hmun 2 te heh Muslim i man, Allah ti hnak khiah Muslim te lek in hmang tuh hnak i thu, biakhnak dang te’n hmang ve le khaw Muslim biakhnak hnok ruai tuh thu phuang fawn ii.
Kum 2009 ah Allah thu man thinrawntu te’n Christian Biakinn te siatsuahhnak um bial ii.
Malaysia ai Catholic, Protestant leh Orthodox pawlpui ten Allah tihnak khiah Bible ah, pumkhawm hmun leh Christian te tawkdunhnak hmun te ah hmang tuh hlen thu phuang ve ii. Zaiman ti fangin, he mi thu Court in a relcathnak khiah The Herald thuthang, Catholic te ai suahhnak thuthang lek ian huam thu phuang ve ii.
Egypt ram Christian te heh 100 ah 10 dung lek i napui Allah thu ah tuntian buaihnak um lo ii. Ciabang pahin, Indonesia ram heh Laivum ah Muslim tam ber um hmun ram i napui, Allah thu ah Christian te thawn buaihnak leh harsahnak tawk lai lo ii.
Source – The Epoch Times
Web Admin