Tlawngkainili nia ah Israel ralkap thawng tam ngai in Gaza Strip sim pan hang ii. Ni 10 song Hamas lam in rocket 1500 hnakin tam sawn hmangin Israel kaap leek zo lo laihnia kua hmangin Hamas te Israel ram ah lut tum ii. Israel in Iron Dome hmangin Hamas te kaaphnak rocket te pawl heh van ah siatsuah sio ben ai Hamas lam mi 200 lai thi zo ai Israel lam 1 thi ii.
Ni 10 Hamas lam in nisiar rocket in kaap hnua Egypt lam in Hamas le Israel ca remhnak rel tuhin sawm ai Israel lam in lungkhim napui Hamas lam in lungkhim lo ai Israel kaap tho tho maanin Israel in laihnia lam sawn in hetin Gaza Strip heh ralkap thawng tam ngai hmangin sim pan hang ii.
Tun heh Israel in kum 5 hnua ah ralkap hmangin laihnia lam in Gaza a tawnghnak a vaikhathnak ii.
Israel ai ralkap thula phuangtu ber Brig. Gen. Motti Almoz in, “Kin ralkap te pawl in ralkap thawng tam roh hmangin vanzuang le lawng lam thawn Gaza ram song ah Hamas hmun poimawh te pawl le lai hnia kua te pawl siatsuah tuhin tank thawng tam roh thawn lut hang ii ing.” ti ii. Israel in Ralkap, Tank le Buldozer thawn laihnia in sim pan ii.
Gaza ai mipui te pawl heh hetin Israel ralkap a lut hlan ah tlaan tuhin Israel lam in ralringhnak pe cia ii. Hamas lam in ngam maanin hetin a phu tawk rul tuhin Israel te in sim pan ii.
Cat lovin tank in kaap:
Israel lamin zan 8 p.m dung pah Gaza ramri ah ralkap le tank tam roh thawn lut pan ii. Ramri dung ah minute caang tank in kaap hnak bomb puak ii. Tipui lam in khai kaap ii.
Gaza ram ai Beit Lahiya khawpui heh tun Israel in roh ngaiin tank hmangin kaap teng ii. Gaza lam ah maisa thi sek ai thim sek ii.
Ralkap 48,000, 18,000 kawi beet tuh:
Israel lam in tun heh ralkap 48,000 hmangin Gaza sim ai ralkap 18,000 kawi beet tuhin Israel ai Cabinet in relcat zo ii.
Israel Prime Minister Benjamin Netanyahu in hetin Israel ralkap te pawl in Gaza a sim ruai hnak san ber tu Egypt in remhnak bawn tuhin a ngenhnak Israel lam in lungkhim napui Hamas lam in lungkhim lo ai Hamas lam in laihnia kua hmangin Israel ram ah lut tum ai kaap tho tho maanin hetin Israel in ralkap thawng tam ngai thawn sim kuul thu phuang ii. Prime Minister in a mipui te pawl heh Hamas lak in humhim kuul ti ii.
Israel lam in Hamas ralkap te laihnia kua ah lut in Israel ram song a lut dawn thiah lai heh vanzuang in kaap ngah ii. Ce, Hamas lam in minung te lo vanzuang hmang ai Israel lam in kaap le tlok sah zo ii.
2008 kum bo lam ah Israel in ralkap thawng tam ngai hmangin Gaza ram sim awng ai 2009 kum thar dung ah Palestinian mi 1,400 le Israel mi 13 thi awng ii.
Hamas in Israel hriing:
Hamas in hetih bang ai Israel in laihnia lam in Gaza tawng maanin Israel in roh ngaiin tuar tuh ve tiin hriing ii.
Reuters thuthang hnen ah Hamas ai thuphuangtu Sami Abu Zuhri in, “Hetin kin tawng maanin Hamas hotu le Palestinian mipui te pawl in Israel lau bul lo ii. Kin in Netanyahu hnen ah hetih bang mivoi thil bawndan maanin Israel in roh ngaiin tuar tuh ve thu ralringhnak pe sawn ii ing.” ti ii.
Israel lam ah Canada tang:
Canada ram ai Foreign Affairs Minister John Baird in Tlawngkainili nia ah Canada in Israel lam tang hlen thu phuang ii.
Iron Dome i lovin Iron Fist sawn:
Israel ai economy minister Naftali in, “Kin tu tun heh Iron Dome hmang loin Iron Fist hmang pan hang.” ti ii. Iron tihnak tu thiir ii ai Dome tihnak heh khuh dunhnak ii le fist tihnak tu kuttum tihnak ii. Israel in Iron Dome hmangin Hamas te kaaphnak rocket lamin khuh dun ai tun tu khuh dun lovin kuttum rori in seu tuh tihnak ii.
Laivum le UN in:
UN Sec-Gen Ban Ki-moon in Israel lam in Palestinian mipui te thi tuh lovin tun hnakin zuam tuhin reel ii. “He dung ai ram te pawl le laivum konghoitu te pawl in i sawmhnak thupui in ruat cel lo maan tun heh buaihnak roh sin hang ii.” tiin pong ii. “Palestinian mipui in roh ze in tuar tuh lovin Israel in zuam tu seh.” ti ii.
France ram foreign minister in hetih bangi Israel in laihnia lam in Gaza a tawnghnak heh a thin hiam lo ngai ti ii.
info