Hla tam rai hlan ah ISIS (Islamic State in Iraq and Syria) heh laivum ah Jihad pawlkom laukul ber ah lar kio ai a hampanhnak al-Qaeda hnakin cak sawn ii.
2014 kum June hla ah ISIS in Iraq ram ziatlam lang ai khawpui Mosul le Tikrit te pawl lang ai le cia hnua ah ti le maisa hmunpui Mosul Dam khai lang kio ii. He pawlkom in Islam sakhua in relhnak Islam rampui Caliphate din le cia ram heh ngaw ruai sinsin tuhin tumtah ii. Caliphate ihnak phuang hnua ah he ram heh English in The Islamic State tiin a hming bawn ii.
Iraq ah ISIS in amah te sanghnak bangin pom lo Muslim te pawl reek ai, Iraq ralkap tam ngai reek ii. Sakhua dang bia Christian le a dang te pawl khai amah te sanghnak sang tuh lo lekhaw tlan ruai ai pom ngahhnak te pawl zohsuamhnak phuncang thawn naupang te tian in reek ii.
ISIS thula 5 liang tlang pha umh ii.
1) A member te in a daihnak zai ber ii?
ISIS heh Islam sangtu phun 2 song ai Sunni pawl ii. A hotu heh kum 43 mi Abu Bakr al-Baghdadi ii.
ISIS in Syria le Iraq ram kom in Sharia daan in Islam ram dinh hiam ii. Syria ram nisuak lam Aleppo ram an Israq ram ai Mosul tian in lang zo ii.
Ralthuam le ralkap a nai zat heh rel har ngai napui London ai Guardian thuthang in a relhnak ah ISIS in Mosul le Tikrit khawpui a lang hlan ah member 6,000 nai zo ti ii. Iraq khawpui pa hnih ISIS in lang ben kio hnua tu Muslim ralkap Jihad pawl dang te pawl in ISIS kop hiam sin sin ii.
2) Kontin he pawlkom hampan?
ISIS hampanhnak heh Iraq in pan ii. He pawl ai tel te pawl heh tunhlan pah Syria ah vai tam ngai mi tawng zo hnak in a tho so ruai sin thu Middle Eastern le South Asian ca geopolitical itelligence lam pawlkom Strafor ai vice-president Karam Bokhari in reel ii.
He pawlkom thar ding hnak san heh U.S in 2003 kum ah Iraq ram tawnghnak in pan ii. He pawlkom heh tunhlan ah Iraq ah thupruk in raltawng thiam roh zo ai 2011 kum ah Syria ram song ah buaihnak suak fangin ISIS mi tam ngai heh ram pahnih ramri kaan in al-Qaeda pawlkom thawn pehzomhnak te kopin Syria ram president Bashar al-Assad ai Shia Alawite acozah tawng ii.
2013 kum ah ISIS heh jihad pawlkom dang te thawn remdun lo hnak umh thu Bakhari in reel ii.
3) Al-Qaeda thawn pehzom awm?
ISIS le al-Qaeda heh pehzom lo ii. A ngom ah al-Qaeda thawn per tlang napui raltawng fangin a lungkhim tlang thil lo hnak al-Qaeda hotu Ayman al-Zawahiri thnawn nai awng ii.
Syria ram ah raal tho fangin Baghdadi in ralkap dinh ai al-Nusra Front tiin ko le cia hne hnuawta ah Sunni Jihad pawlkom ah cang le Assad acozah ai Shia Muslim te pawl tawng ii. Baghdadi in Nusra Front le ISIS heh kop tuhin a tawlrel fangin Zawahiri thinraw thu University of Ottawa ai Middle East lam mithiam Jabeur Fathally in reel ii.
Cetin ISIS heh hnawta lam ah al-Qaeda thawn khandun kio ai Baghdadi lam in tumtahhnak danglam nai maanin ii. A tumtahhnak ber tu ram lang tuh ai cia heh Caliphate (Islamic State), Islam rampui dinh tuhin ii.
2013 October ah Zawahri in thu suah ai al-Qaeda in Shia Muslim te pawl, Ismailis, Qadiyaniat, le Sufi pawlkom te pawl tawng loin ramdang te sawn, a reel hiamhnak tu U.S tawng tuhin thu suah ii.
ISIS in a hmasa ber in a tawnghnak ber tu Shia Muslim in konghoihnak acozah te pawl ii.
Washington, D.C ai mithiam Cato Institute ai Benjamin Friedman in a reeldaan in ISIS in a tumhnak tu laivum huap i loin amah te ram song thula i sawn ti ii. A thil fehpuidan heh laukul roh napui laivum huap politics i loin amah te song/local politics i sawn ti ii.
Inapui tun naai ah ISIS mi pakhat in U.S mi journalist James Foley hawng a tan hlan ah a relhnak thula ah ISIS in U.S hriinghnak ponka tel ii. U.S acozah in Iraq acozah le Kurdish ralkap te pawl bawmhnak a pe hnak maanin ISIS lam aang lo ai August 19 nia ah James Foley heh ISIS mi pakhat ina hawng cem hnak video heh internet ah a hlat ii. Hetan ISIS ai tumtahhnak heh amah te ram song i lo ai rampua lam, U.S lam tian tel tihnak lar ii.
4) ISIS in kon ai sumsaw nai?
ISIS heh ram pua ai te pawl in sumsaw khon tlang in bawmhnak le amah te songin mipui te hnen an sumsaw a langhnak te ring ber thu McGill University ai political professor Rex Brynen in reel ii. Cen, he pawlkom ai rualpui pha heh Gulf ram te pawl ii.
Cen, rampua in sumsaw a petu ber heh Arabia le Qatar ram in ii ai he thu heh acozah lam in phuang lo napui sumpai milian te hnen an linghnak ii.
He pawlkom in ram thar a lang ngah caangin sumsaw ngah beet tio ii. June hla ah ISIS in Mosul khuapui ai bank songin $450 million lang ngah ai Iraq ralkap te pawl in hlumhnak ralthuam te pawl lang zianzo in ralthuam pha pha nai sinsin ii. ISIS in sumsaw heh mipui hnen an konghnak le a langhnak in ngah ber ii.
A op ngahhnak ram song ah zinaan/oil khur te pawl umhmun Syria ram ai Raqqa khua an sumsaw tam ngai khon ai a lian ruai ii. ISIS in zinaan/oil heh ramdang te hnen tian ah zuar ai a raal Syria ralkap hnen tian in zuar ii.
5) Iraq mi te hnen an lungkhimhnak ngah maw?
Concordia University ai political science professor Henry Habib in tun bang ai caan com niu song ah ISIS in Iraq ram khuapui tam ngai a lang thilhnak san heh he ram ai Iraq mi te pawl ai bawmhnak le lungkhimhnak tel loin thil cang thil lo ti ii.
He pawlkom in Shia Muslim acozah daihlotu Sunni mi te pawl ai lungkhimpuihnak lang thiam ii. Iraq acozah in a khelhnak tu acoza konghoitu te pawl ah Sunni mi tam ngai tel ruaihnak ii le he maanin ISIS in Sunni Muslim daan in a fehpui fangin Iraq mi Sunni lam in bawmhnak tam ngai ngah ii.
Iraq khuapui Mosul le Tikrit te pawl ISIS in a lang thilhnak san ber tu he khua ai umh te pawl in Shia Muslim Maliki ai konghoihnak a rim ze maan ii tiin Washington, D.C ai Brookings Institute ai foreign policy research ah Director Michael O’Hanlon in reel ii.
ISIS a cakhnak san ber tu thil a fehpui thiamhnak maanin i ber ai Sunni Muslim pawlkom dang dang te pawl ai lungkhimpuihnak maanin ii. Cia pawlkom te songin Iraq acozah hotu Saddam Hussein in a hnawn hnak Baathist raalkap te pawl heh ISIS bawmtu pawlkom te lak ah tel ngio ii.
Source: cbc.ca
info