by- Salai Tluang Kip Thang
Hamlak ai ramsa in ngahhnak sa heh Bushmeat tiin ko ii. Western te in hamlak ai sa heh Game Meat or Wild Meat tiin ko ii. Hamlak ramsa in zai ur nai tihnak lin lo maanin ram khangso te tu ai hiam de lo ii. Hiamhnak phunkhat sawn in sa kaap de ai, kaap tuh fangin acozah in sianghnak te ian kaap de ii. Kin Laitlang lam bangin hamlak ai sa heh rong/rongmeh in hmang de lo ii.
Zaimaan Bushmeat ai pha lo ii?
Minung le ramsa ah urhnak tam ber heh Virus, Bacteria le Parasite te bang mit in hmu thil lo hnak nunhnak nai te pawl maan in ii. Cia bang te songin Virus heh tunnia tian in laivum minung in neh thil lo hnak thil nung phunkhat ii ai tun tian in virus reek thilhnak le neh thilhnak si (drug) tawk ngai ngai lai lo ii. Cia leek zolo Virus te pawl heh nuam niu niu in khangso zianzo ai haat sinsin, cak sinsin ai minung in neh ben lo sinsin in umh ii.
Minung ah umh lo hnak virus phun dang te pawl heh ramsa ah umh de ii. Ramsa ai virus heh minung ah lut fangin a nungdan danglam kio de ai cetin tunhlan ah ramsa ah ian nung thilhnak virus heh minung ah nung ai minung ah umh awng lo hnak ur phun dang dang hleng de ai lawm thil loin thihhnak ah cang de ii. Ramsa an minung ah hlenghnak virus tam ngai lak songin a laar le a laukul roh te pawl tu thi vual thilhnak Swine Flu, Bubonic Plague, HIV,Polio, Yaws, Anthrax, SARS le tun dung Africa ah hla tlawm niu song ah mi thawng tam ngai thihnak Ebola virus te pawl tel ii.
Ramsa phuncang lak songin minung thawn DNA bangdunhnak tam te pawl hnen an minung ah virus lut baai ber thu scientist te in reel ii. Minung thawn DNA bangdunhnak tam ber ramsa te songin zawng/chip (70-98%), buthi/mouse (92%), palab/bat (85% ), zawhngeu/cat (90%), kawlpaw/cow (80%) te pawl ii.
Minung thawn DNA bangdunhnak tam ramsa te hnen an virus heh minung ah nung baai niu tihnak ii.
Kin pipu san pah Laitlang ah hamlak ah sa kaap in sa tlun de ii. Hamlak in ngahhnak sa heh ur cangce, songlawi ce in ruat ii sing. Inapui nuncakhnak lam in siik fangin hamlak ai ramsa an ur phuncang ngah baai niu i maanin hamlak ai sa kaap lo pha ber i hang.
Ramsa ai virus lak in him tuhin Bushmeat (hamlak ai ramsa) ai tuh lo, ramsa hnen an hliam tuar tuh lo, ramsa in aihnak thingthai te pawl ai tuh lo. Zawng thisan le zawng hluak a hing in ai/diong pha ti de hnak pha lo ze tihnak ii. Uico thi ding pha tihnak khai a laukul ze sawn ii.
Laitlang ai ramsa tlawm sinsin thawn, a sa ai pha cuang lo thawn tun pah kin Zanniat ulenau te rel dun in hamlak ai ramsa kaap tuh lo le a sa ai tuh lovin thupha cuuk dun nga sing.
info