Israel ram in acozah thar rilhnak March 17, 2015 nia ah nai ii. Zuamdun party 10 umh ai cia song an Benjamin Netanyahu ai Likud party in tohhmun 30 ngah in a acozah awhtu ber dinhmun ngah ii.
Rildunhnak ah Israel parliament ah tohhmun tam ber ngahtu party in acozah dinhdan ii. Israel parliament heh Knesset tiin ko ai tohhmun (seat) 120 nai ii. Party 10 song an Likud in 30, Zionist Union in 24 ngah ai tohhmun ngah lo party pakhat umh ii. Acozah ding tuhin parliament ah tohhmun 61 ngah kuul ii. Tun dinhmun ah party pakhat ian in acozah ding thil tuh lo i maanin tangrual acozah (coalition government) ding kuul dinhmun ah umh ai Netanyahu ai Likud party in konghoi thil ber dinhmun ah umh ii. Zionist Union in tohhmun 24 ngah napui party dang thawn tangrual selai Likud party neh thil tuh lo dinhmun ah umh ii.
Netanyahu in acozah rildunhnak nai tuh fangin a party in acozah ding thil lekhaw thil poimawh ngai pahnih tiamhnak nai ii, Palestinian State ding thil tuh lo hnak le Jerusalem nisuak lam ram ah Israel mi ca inn thar tam ngai dinh tuh ii.
Benjamin Netanyahu heh 1996 kum ah Israel Prime Minister per pan ai Prime Minister 9hnak ii. Cia hnua 2013 kum ah Israel Prime Minister i leh ii. Tun kum 2015 ah acozah ding lekhaw Prime Minister i thil leh tuh ii. Israel Prime Minister heh kum 5 parliament office ah to de ii. Israel acozah ah President heh a lu ber i napui thunaitu ber heh Prime Minister ii.
Benjamin Netanyahu heh October 21, 1949 nia ah Jews mithiam innsang an Tel Aviv khuapui ah suak ii. Israel Prime Minister te lak ah Netanyahu heh Israel ram ah suak hmasaber ii. Israel Defense Forces ah tel ai 1967 kum ah Ni Ruk Raaltawnghnak (Six-Day War) ah ralkap Sayeret Matkal special forces hotu i awng ii. 1968 kum ah Operation Inferno raaltawnghnak ah, 1968 kum Operation Gift raaltawnghnak ah, 1972 kum Operation Isotope raaltawnghnak ah tel awng ai 1972 kum ah a liang ah maithal kaap tuar awng ii. 1973 kum ah War of Attrition le 1973 kum ah Yom Kippur War raaltawnghnak ah hlanta lam ai raaltawngtu ah tel awng ai Syrian ramri lam tian in ralkap te thawn lut awng ii. Ralkap a per lai ah Captain ihnak co ngah ii. 1984 an 1988 kum tian United Nations ca Israel Ambassador i awng ii. 1996 kum an Likud party ah tel ai 1996 kum ah 9hnak Israel Prime Minister per pan ii. 1999 kum rildunhnak ah tling leh lo ai acozah naper lo lam sawn ah umh awng ii. 2002 kum ah politics ah lel leh ai Foreign Affairs Minister (2002-2003), Finance Minister (20003-2005) te per in Ariel Sharon Prime Minister acozah hnia ah per awng ii. Sharon acozah thawn Gaza ram thula ah lungkhim thil loin acozah an suak leh ii. 2005 kum ah Likud party hotu ah cang ii. 2006 kum December ah Netanyahu heh Israel parliament (Knesset) ah Opposition Party ah hotu ber (Leader of the Opposition) ii ai Likud party Chairman ii. 2009 kum ah Israel acozah rildunhnak ah Likud party in tohhmun tam ber ngah ai party dang thawn kom dun in acozah dinh ai Prime Minister per ii.
2012 kum ah Forbes magazine ai laivum ai thil ti ben ber mi te a rilhnak ah 23hnak ah Benjamin Netanyahu tel awng ii. 2014 kum ah Jews miphun song an laivum ah thil ti ben ber te lak ah 3hnak ah tel thu The Jerusalem Post in phuang awng ai 2012 le 2010 kum ah pakhathnak i awng ii.
info 