Kawlram acozah in tlangvum miphun hriamnam awh te thawn pondunhnak nai ben hnua ah thutlangpui in remhnak laai bawn in lungkhim zo thu March 30, 2015 nia ah phuang ii.
Remhnak thu reelin ni 7hnak ah acozah ai Union Peacemaking Work Committee (UPWC) le Nationwide Ceasefire Coordination Team (NCCT), tlangvum mi palai 16 te pawl thawn remhnak tuh thu poimawh te reel ben sek ai a lungkhim tlang thu press conference ah phuang ii. Tlangvum lam le acozah in laai pakhat ian suah tuhin lungkhim tlang ai March 31 nia ah hming kheen tlang tuhin a lungkhim vek ii.
He lungkhim tlanghnak in hmai hla song ah Kawlram miphun veksen huap khawmpui nai tuh ai a nia tu hnawta ah phuang tuh thu U Nai Hong Sar le Dr Salai Lian Hmung Sakhong, NCCT ai hotute in phuang ii.
UPWC lam in U Hla Muang Shwe in tlangvum miphun veksen ai lungkhimhnak laai ngan ben lekhaw acozah lam in hming kheen tuhin a lungkhim thu reel ii.
NCCT ai hotu U Nai Hong Sar in Kawlram acozah thawn remhnak laai heh 95% dung ngan ben liang zo ai 100% i thil tuhin Kawlram huap miphun veksen thawn tawkdunhnak khawmpui nai kuul tuh lai ti ii. NCCT lam in miphun veksen in acozah thawn remhnak tuh thula a tawlrelhnak te heh a lungkhim tlang liang thu khai reel ii.
info