Tluang Kip Thang: Torr Miphun Le Zanniat

Torr Miphun Le Zanniat
(Tluang Kip Thang, Ottawa, Jul 9, 2015)

Torr miphun heh 1896 kum ai suahhnak The Chin Hills volume 1 laibu ah tel leek zolo, cia san ai British in nganhnak dangdang ah he miphun hming heh hmu pha umh ii. British te in khua le ram thula a zong fangin mi hnen ai thula zawt kongin langhnak i maanin a linghnak te pawl heh a khim lo thai napui cang thil tawpin record a bawnhnak i maanin ling tlang pha ii. Torr thula ah I khelhnak le he hnakin fiang sawn in kin reel bentu umh lekhaw ang kul ngai tuh ii.

He laai i ngan hnak ah Chin Hills volume 1 ai miphun, khua le ram hming a nganhnak bangin hmang ing. Thil hming tam ngai songin kin ling sual tuh lo hnak te tu Tashon tihnak heh Taisun (Tlaisun) miphun, Siyin heh mi tam sawn in kin linghnak Sihzang miphun relhnak ii. Siar baai tuhin hetin Torr thula a hnia ai bangin ngan ing.

Torr suahkendan thuanthu:

Torr miphun heh a cak roh awng ai laivum ah amahte tawngtu raal nai loin umh awng ii. Hnuata ber ah van ai Ni khiah lang ngah teek tum ai van lawnhnak kaaipum sau roh bawn tlang ii. Hetin van lawnghnak a bawn fangin a sau ze maanin amahte song ah remdun lo hnak umh pan ii. Mi hrekkhat in kaaipum a lawn lai ah a hrek in kaaipum hnia lam ceek sah kio ai saklam ah sawn ii. A sawn hmun heh Kale ramri ii ai Tawyan ram ah cang ii. Kaaipum an tlok khalkhaw mite khiah zai khai tuahmawh dunhnak umh lo ii. Amahte umhhmun khua ah tlung thiam nawn lo maanin Falam (Tashon/Taisun) ram song ah khuasa tlang ii.

Torr miphun umhmun:

Torr miphun heh Kale hmunrawn ah khua li (4) umh awng ai Tawyan tiin ko ii. Torr miphun pupa te pawl heh Rawvan dung ah le Kan-Haka lampui dung ah khuasa de ii.

Tates ihlahlekhaw Siyins (Sihzang) miphun heh Torr miphun khua le ram lam an vaaihnak ii. Cen, Torr miphun heh Hakha ram lam in kawi hnak in ling ai kontin Falam ram songah umh tihnak Chin Hills laibu ngantu in a aaicaan ii. Thula zonghnak ah he miphun heh kum rai ngai Kwesin khuate ah umh lianglo zo ai Kale state ramri ah umh ii.

Tashon thawn tawngdunhnak

(He thula heh Pu Za Thlai in nganhnak Lumbang Ram Mawi le Zanniat Tluanthu ah Khualai tlangriat paai thu a nganhnak thawn a bangdun roh ai 1810 AD kum dung i tuhin ngan ii.)

Torr miphun umhmun heh Kale thawn ramri hmun ah umh maanin he ram heh Sawbwa le Tashon lal te lungrualin Kalaymyo le Falam karlak ah amah te palai nai tuhin buai tlang ii. Hnuata ah Torr heh Falam ukhnak hnia ah umh kio ii. Ikhalkhaw amah te uktu thar Falam hnia ah Torr khua veksen le khua dang Lomban (Lumbang?), Lunhaw (Lunghawh?), Kolai (Khawlai?), Lati khua te thawn roh ngaiin zonzai tuar ii. Hetin Torr le khua dang te lungrual in Manipuri run tipui kaanin Falam ai pasal umhhnak veksen reek tuhin relcat tlang ii. Run tipui kaanhnak tuhin rii thawn bawnhnak lai veksen heh aisu khai khatlam le khatlam kaan thil tuh loin kham ii. Hetih bang ai tumtahhnak heh Falam in ling lo ii. Shunkla-mi (Sunthla?) vai tam thah run tipui kaan in sakaap le thil phur in kawi te pawl khiah pom de ai Losum khua ah fehpui ai reek de ii. Hetin Falam mi 80 lai reek ngah awng ii. Hetin a pomhnak te songin mi 2 heh luat ngah kio ai Minledaung lam ah tlan ai cetah mite in humhim sah le thupruk in tipui kaan pui ii. Hetin Falam in a vum ah tapkha raalthohnak umh thu ling ngah ii. Tashon lal in a bawnkeel bangin Yahow (Zahau?), Whenohs (Hualngo?) le Sunklas (Sunthla?) te vesek sawmin tipui kaan ai tapkha raalthotu miphun le khua veksen khiah siatsuah sek awng ai Burma (Kawlram) lam ah tlan ngah te ian thihhnak le sal in luat awng ii.

Tashon (Taisun) sal

Lomban (Lumbang?) khuabawi Yan Aung (Lian Aung?) in Falam lau in kum 27 Kale hmunrawn ah tlan ai relh awng ai a rualpui veksen heh cetah Malaria le ur phuncang in thi sek awng ai amah ian nung le hnuata ah amah le rualpui dang taanghnak te pawl ca Tashon (Tlaisun) hnen ah ninghio ngen leh ii. Tashon (Tlaisun) in amah te sal ah umh hlen tuh lekhaw Laitlang ai a khua ah tlung thil tuh tiin sawn ai Yan Aung in lungkhim in tlung ii.

Hetih bangin Torr in Falam lakah raalthohnak maanin a miphun le a rualpui dang te ca roh ngaiin hnawmcanhnak cang kio ii. Hetin a miphun le a rualpui te thawn Falam hnia ah sal (slave) in umh ai Burma (Kawlram) lam ai Ci (salt) le Kawlfaang (rice) heh amah te ca le Tashon (Taisun) ca phur tio kuul ii. Tashon (Taisun) in sal te hnen an lovangin a ngahhnak heh Yahows (Zahau?) le a hiang ai khua dang te hnen ah zuar de ii.

Tahson (Taisun) in ci heh manlo (free) in ngah maanin he naper heh a kho thai berin bawn ii. Hetin lovangin a ngahhnak ci heh Tashon (Taisun) in man nai ngaiin zuar de ai hmun dang ai thula ling lote hnen tian in zuar de ii.

A hnia ai te pawl heh Tashon hnen ah manlo (free) in Burma (Kawlram) an Falam khua karlak ah ci phur sah tuhin daan bawn ii.

1. Tawyan (khua 4, Torr miphun)
2. Noran
3. Kawa
4. Twetten
5. Lumte
6. Yanli
7. Suang Kwa
8. Vanyin
9. Lowson
10. Kun Yin (Khumzing?)
11. Shim Sing (Sim Cing?)
12. Yote

A hnia ai te pawl khai Tawyan, Torr miphun thawn Tashon (Taisun) lak ah raaltho ve ai Burma (Kawlram) lak an a hla ze maanin ci phur sah tuhin remcang lo maanin siah (Tax) tam roh kum siar pe tuhin daantat ii.

1. Lomban (Lumbang?)
2. Pate (Parte?)
3. Lati
4. Lunhaw (Lunghawh?)
5. Kolai (Khawlai?)

He khuate in Falam ca lovaai sah kuul ai kum siar khua khat song ai innsang pakhat ten in Laaifaang (millet) bawm khat (1), innsang tam zaimawzah huap in kum thum (3) vai khat (1) Sel (mithun) pakhat (1) le thildang te khai Falam lalte (Falam chiefs: hetah plural hmang ii) te hnen ah pe tuhin daantat ii. He ian i loin, innzuat ramsa songin hmun li (4) ai hmun khat (1), ¼ heh Falam ai ii. He leek zolo, mawhhnak le khelhnak bawn lekhaw roh ngaiin Falam hnen ah kuan kuul ii.

Tashon (Taisun) in a minung pahnih (2) heh Minledaung te in humhim sah hnak vum ah a aang ze maanin Tawyan, Torr miphun te bangin ci phur kuul loin a hnia ai khuate in a siang tawkin Falam hnen ah siah (tax) pe tuhin daan bawn ii.

1. Minledaung (khua 6)
2. Hnorr
3. Kwanglon
4. Mangsum

Pu Za Thluai in nganhnak laibu song ai bang i lekhaw Falam hnen ah pe tiohnak Lukhawng heh 1906 AD kum ah luat ai 1910 AD kum ah Falam hnia an Siah (Tax) luat ii. Hetin bangin a luat thilhnak khai British hnia ah Tashon (Taisun) umh ai British hnen ah ninghio hnenhnak maanin British maanin luat hnak ti thil ii.

Torr le Zanniat

1943 AD kum ai H N. C Stephen in nganhnak The Economics Of The Central Chin Tribes song ai nganhnak ah Torr thula heh ramzuk (Map) ah tel ngio ai Latlang ai Zanniat ram song ah umh ii. Ciamaanin British in phan tak ngaiin lai ah a khumhnak siik in Torr miphun heh tun ai mi tam sawn in kin linghnak Zanniat miphun a relhnak i tuh ii. He thula ruatin Zanniat song ah phun le nam umhdan ruat pha umh zianzo ii.

References:

1. Carey, Bertram Sausmarez. (1896). The Chin Hills: A History of Our People (Vol. 1),Page 146, 147, 148
2. 3. H N. C Stephenson, The Economics Of The Central Chin Tribes, map III
3. Za Thluai, Lumbang Ram Mawi le Zanniat Tluanthu