Kawlram 2015 Election ah Tlanvum Party kin kuulhnak san Pa Thang Boo in a hnia ai bangin Zanniat Thuthang Facebook ah nganhnak hlat ii sing. (Editor: Zanniat.Info)
Mipui ruat dan Political -3
– Thang Boo (https://www.facebook.com/thang.boo.5)
Kin Laimi tam sawn in Democaracy heh NLD ta ai Aung San Suh Kyi ai tin ruat de i sing. Democracy kin daih man in Kin Laimi or Tlangvum miphun pawl in nunhnak liam zai maw zat in tuar ii. Cia te pawl khai ruat sal kin kul ii.
2015 Kawlram uktu Tamahdah (President) ril tuh dan heh caan rem cang le khaw rel tlang leh nga sing khaw.
Tun ai thu kin relhnak heh Lairam thawn dian pehparhnak thu deuh i tuh ii. Cen, he mi party ah vote pe tu ti hnak i loin 2015 election ben hnua Ram pui feh tuh dan pawl rel tuh ing.
Zaiman Federal kin kul ai, zaiman tlangvum miphun Parliament song ah um kin kul ii ?
Lailungvum pui ah Kawlram heh Ram Farah ber ii. Ciami song ah Lairam heh Farah am ber lai ii. Zaiman kin farah tih kin ling thil hnak heh 2011 UNDP in cazin langhnak song ah hmu thil i sing. Kin Farahdan tu Kawlram pumpui ah 26% i ai, Laimi pawl tu 73% i sing. Umhdan tu Lairam ah mipum 100 ah 73 kin farah ti hnak ii. Cia heh a kontin ling thil ii sing ti le World Bank te pawl in Minung pakhat in nikhat tangka laluthnak $2 ngah lo heh farah tin rel hnak ii. $2 × 1280 = 2560. Umhdan tu mipakhat in nisiar Ks. 2560 ngah lo pawh heh Farah ti hnak ii. Kin Laimi pawl ai kin buai pui sawn hnak tu farah 73% pai tuh hnak in a kawn tin hmaa lang tuh ii sing ti heh kin ruat kul hnak sawn ii. Kawl pawl (USDP, NLD ) pawl kin Laimi kin farahhnak kin buai pui lo ii. Parliament (Hluttaw) song tokham ngah tuh heh amahte buaipuihnak ii. Kin Laimi kin rikaam, kin farah in khai kinmah Laimi thotho in ling i sing. Ciaman tun kum July hla Ruahpui man kin ram song ah harsa tawk i sing. Ram song ram pua Zanniat fate pawl um ben lo in Bawmhnak tam ngai pe i si. USDP, NLD kawl pawl in he bang thu ah a buaipui hnak i lo ii. Hluttaw song tohkham ngah tuh heh a pakhat hnak ii. Tlang vum miphun pawl ai kin Farahhnak bo tuhin tu Democracy hnak in Federal kin kul sawn ii. Cabinet song ah Vuankyi he 108 um ii. Vuankyi thawn in bangdun te thawn in minung 150 vum um ai Chin state ah Vuankyi 9 dian nai ii sing. Vuankyi pakhat ai hlawh le motor-driver man, P.A man te thawn in Vuankyi pa khat in Ting Sawm li (Ks. 4,000,000) hlawh ii. Vuankyi 150 vum × Ks. 4,000,000 = Ks. 600,000,000. Hla khat ai Acozah Budget hmanghnak kum khat ah Ks. 600,000,000 × 12 = Ks. 7,200,000,000 he mi tangka (Heavily) tam ngai in hmanghnak heh State ah hmang sawn selai kin miphun hrang phathnemhnak tam ngai umh tuh ii.
Kin ling cia hnak bangin 2015 Election ah tu party pakhat dian cak ngai tih um thil tuh lo hang ii. Zaiman tifangin POLITICAL VOL-2 ah kin rel zo hnak bangin 2015 tu Party 92 in Parliament ah Tokham cuh tlang tuh ii. Kin daih ta, daih ta lo in khai 2015 election ah tu Nguin-Poung Asuzah (coalition ) in feh pui tuh ii. 2010 election lai ah Rampui feh dan felfai ngai in feh pui ben lai lo man in Tlangvum miphun covo (Rights) heh Parliament song ah cak ngai in hmaa lang/Rel ben lai lo ii.
Zaiman tlang vum miphun(party) Parliament song ah kin um kul i ni???
2015 Election ben Acozah ding fang in Parliament song ah Tlangvum miphun (Party ) te um lo le sing khaw kin covo tampui kin sung tuh ii. 2008 Constitution heh 2010-2015 sung rem ben lo hnak 2015-2020 song ah roh ngai in Danhampui (Constitution) Rem tuh i hang. Zaiman tlangvum miphum (Party) kher kher um kul i pa? USDP, NLD song ah tang Laimi or Tlangvum miphum umh lo i awm? Ruat ngah thei ii. USDP, NLD party policy tuh BA-HU-OO-SII in fehpui ii le umhdan tu kin khua hrang thil pakhat kin kulhnak um le kinmah daih bangin Hluttaw (Parliament ) sung ah au thil lo ii. Avum lam hotute ai lungkhimpuihnak um lo in mah daihdan in thu rel thil lo ii. Tlangvum miphum party te tu zalen ngai in Hluttaw (Parliament) song ah kin miphun hrang au pui thil ii. Cia heh a dang lam hnak i. Tlangvum miphun party um kuul lo in Party pakhat ah um sio singlai kin ram miphun hrang covo (Rights) kin sung tuh sio ii. 2015 Hluttaw ai rel ben lai lo hnak Loram (Kin pi, kin pute ai Ram ) Thu hla ah khai nasa tak in rel kin kul tuh lai ii.
Note- A kon party kin daih ai, a kawn party kin daih lo ti hnak i lo in, 2015 election Kawlram feh tuh dan thlir khawm hnak) Na daih hmun ah umh thil i si.
info