Kawlram (Myanmar) acozah le ralthuam nai tlangvum miphun pawl in October 15, 2015 nia ah ram pum huap remhnak laai ah hmin khen tlang tuhin a lungkhim hang tihnak acozah lam in October 4 nia ah phuang ii. He remhnak laai ah tlangvum miphun pawlkom veksen huap tuhin tumtah napui tun dinhmun ah pawlkom 8 ian huap thil lai ii. Remhnak heh Naypyidaw ah October 15 nia ah hmin khen tlang tuh ii.
Acozah lam ai plai Hla Maung Swe in, “Pawlkom dang te khai he laai ah hmin khen tlang tuhin sawm tuh ii ing.” tiin tlangvum miphun pawlkom 15 ca huapin AFP thuthang hnen ah reel ii. Hla Maung Shwe in remhnak heh Kawlram mipui le ramdang palai te mithmuh rori ah hming khen tlang tuh tiin phuang ii.
Tun ai remhnak laai ah telhnak pawlkom 8 song ah Karen National Union khai tel ii. Ikhalkhaw Kachin Independence Army tu he remhnak laai ah tel tuh lungkhim lo ai acozah ralkap thawn tunnaai tian kaap dun hlen lai ii.
Tlangvum miphun veksen huap pawlkom United Nationalities Federal Council in politics in pondunhnak in remhnak ngaingai umh thil tuhin ramdang pawl in bawm tuhin bawmhnak ngen ii.
Acozah lam in he remhnak laai ai tel lo te khiah kaap tuhin tumtahhnak nai lo tiin Myanmar Peace Centre, Yangon in phuang ii. “Hetih bang ai remhnak laai ngan tlang tuhin acozah lam in lungkhim tuhhnak heh thil har ngai ii. Zaimaan tifangin sakta lam pawl khiah tel hiam lai lo ii.” tiin Facebook page ah acozah lam in KIA thu relhnak nai ii.
Hetih bang ai acozah le tlangvum miphun karlak ah remhnak umh tuhin a buai roh lai ah Aung San Suu Kyi in NLD party in ram pum huap a cozah rildunhnak November 8, 2015 nia ah vote tam ber ngah tuhin zuam lai teng ii.
Acozah le tlangvum miphun kaapdunhnak manin Kachin ram lam ah 2011 kum an tuntian raaltlaan in mipui 100,000 val inn le lo hlum in umh hang ii.
Shan ram lam Kokang lam ah acozah ralkap thawn roh ngaiin kaap dun ai mi tam ngai China ram ah tlan ii. Shan State Army-North (SSA-N) le acozah khai October 6 ah kaap dun leh ii.
info