June 18, 2020 nia ah Canada prime minister Justin Trudeau in COVID-19 lakin him tuhin phone ah app thar thun in aisu heh COVID-19 nai hiang ah umh ti lin thilhnak heh Ontario province ah hmang pan tuh ai, cia hnua Canada ram huap in hmang tuh hang tiin phuang ii.
He phone app heh Black Berrry Ltd le Shopify Inc company te in bawn tlanghnak ii. He phone app heh a daihtu te lungkhimhnak in hmang tuh ai, a hmangtu tam amam lekhaw COVID-19 dinhmun ling thil tuh sinsin i maan hman tlak ngai in cang thai ti ii. He app in Bluetooth hmang tuh ai, COVID-19 nai le nai lo thula heh health official lam in thun tuh ai, COVID-19 nai hiang ah umh le singkhaw cia phone app in ralring hnak kin pe tuh ti ii. Tun dinhmun ah Canada ah COVID-19 naitu heh mi 100,000 khim zo tiin phuang ii.
Hetin phone app hmang tu feh hmun cang ling thil tuh i maan khat lam ah bulpak thula himhnak umh tuh lo hang maanin lungkhim lo tu tam ngai suak ii. Hlan lai ai Hitler san Germany ah mipui te heh rohsia in acozah lam in thu le la lam ah thu nai sio hnak thawn kin bang tuh tiin a laukul lam in a langtu te khai umh ii. Bulpak in sianghnak tel lovin cia mi ai thula heh he app hmangin lang thil tuh i maan a lautu tam ngai ii.