February 1, 2021 nia ah Kawlram cozah thuthang hlathnak Myawaddy TV in Kawlram cozah heh Tatmadaw in camkhat ukhnak lang lio in phuang ii. Hetin a lang thilhnak heh 2008 kum daanpui song ai Article 417 song ai rampum huap in buaihnak umh fangin tatmadaw in cozah lang thil hnak khiah sirhsan ii. Camkhat Kawlram President pertu U Myint Swe in he thu phuang ii.
U Myint Swe heh tunhlan ah ralkap bawi (general) i awng ai, National League for Democracy (NLD) cozah (2016-2020 kum) ca Union Solidarity and Development Party (USDP) lam in Vice President in umh ii.
Thuthang in phuanghnak ah Kawlram heh thubuai in umh lekhaw 2008 daanpui ai Article 418 hmangin ralkap ai commander-in-chief Min Aung Hlaing kut ah umh tiin phuang ii.
Kawlram huap cozah rilhnak (General Election) 2020 kum ai bawnhnak ah vote dik lo tam ze umh maan daan lovin cozah heh NLD in per tuh lungkhim lo maan, tiin thu phuang ai, vote thula te zingzoi tuh ai, phan takin cozah rildunhnak bawn leh hnua fangin cozah thar hnen ah thunaihnak ap leh tuhin phuang ii. Hetin tatmadaw in kum khat song cozah awh tuh tiin phuang ii.
Hetin Tatmadaw in cozah thunaihnak a lang hlan niu ah Dawng Aung San Suu Kyi le President U Win Myint khiah pom cih ii. NLD ai chief minister te, minister tam ngai, daanthiam le cabinet member te tian in pom in thu thang ii.
Hetih bang ai vote dik lo thubuai ah People’s Alliance for Credible Elections (PACE) ai executive director in U Sai Ye Kyaw Swar Myint a relhnak ah rampui rildunhnak ai vote thula ah dik lo hnak thubuai khiah Union Election Commission (UEC) in tawlrel tuhhnak ii ai, a kul bangin thula phuang tuh hnak napui, tiin rel ii. Election nia ah vote hlat hmun polling station umhdan khiah a him lo napui Kawlram huap constituency 315 in sik fangin vote in nehhnak danglam tuh tian i vote dik lo umh tuh lovin rel ii.