31 October, 2011 nia khiah Irag ram ai Syriac Catholic Church ca kum khat khimhnak Muslim te in Christian te heh 2003 kum ah reek awnghnak ii. He teng fang in Pathian thangphat teng Chrisitan mi 58 heh Muslim te in reek awng ii.
Cia Christian le Muslim rekdunhnak heh US in 2003 kum ah Iraq ram a do hnua ah a roh ber ai tun tian Baghdad khawpui ai Christian te tu khawsong ah umh thil lo law law in hmundang ah tlan kuul dinhmun ah umh ii.
UN ai thuthang pakhat IRIN tihnak ah Iraq mi Jamal Habo Korges in, “Kin tuarhnak tam ze hang. Iraq ram suahsan heh kin kuul hang ii” ti ai “2003 kum pah tuar ben lo hang ii ing.” ti ii.
Siangbawi Doughlas al-Bazi khai tunhlan kum 4 ah roh ngai in hrem tuar zo ai 1990 kum dung ah pawl ah innsang 2,500 dung nai awng hnak tun tu 300 hnakin tlawm sawn taang hang ii.
2003 kum dung ah Iraq ah Christian heh minung million khat hnakin tam napui tun tu mi 350,000 dung ian taang hang ii. He ram an tlaan te heh ram hnihhnak ah tlaan tam roh tlaan ai ramthumhnak tian tlaan te khai umh ii.
Laivum ai Iraq mi refugee umzat million hnih song in a hrek heh a ram hiang ai Syria ram ah umh ii. Raaltlan Iraq mi song ah 25% heh Christian te ii.
Syria ram ah tlaan Iraq Christian te heh zai khai keng lo ai amah te silhnak hnipon ian bag niu in keng de ti le ninghio kul roh tiin World Magazine ah ngan ii. Syria acozah in a ram heh Iraq mi raltlan Christian te heh naper khai siang lo ai a ram ah umh thilhnak khai pe siang lo ai, siik hiam lo law law ii.
Hetih bang ai Syria ram ah Iraq Christian te in harsahnak tuar napui ramdang in siikhnak tlawm roh le Iraq ram ai Mar Dinkha IV (Patriarch of the Assyrian of the East church in Iraq) in “Zaimaan nitlakhnak lam ram te in he Christian te heh bawm lo ii” tiin pong ii.