Pau Tin Hau heh amahte Tidim te in tu Pau Cin Hau ti in ko de ii.
Kum 1859 fang Tiddim ah te i. Sukte hin Bawi innsang in te hnak Lalfa i. Ciahnua ah Laituiah khua thawn i. He khua a um lai 1888-1902 karlak , kum 15 dawnlai song memalo in ur ai a thidawn belengsam i.Ciatih laitakin azan manglam banginvanram le hellram, Laivum santhleng lianglo te, thleng ve awnglo Pathian thu te a phunphunin hmu in rel i. Ciatihin sawngen tuh ai, a ruai bangin saw a ngen hnua pah lo cak vual i. Kum 1948 December 20 nia ah thi i.
” Pau Tin Hau heh Mizoram a tlawn lai in Khristian biakhnak( sakhua) khiah daih in pha ti hlaihlawr ai, a khua lam a tlung leh hnua fangin a khuapum puluk Khrihfa ah lutsio daìh ngai i. Mizoram a tlawn lai ai a la thiamhnak pakhat…,
Isua Krista thisen chauh lo,
Beiseina dang reng ka nei lo.,
ti la heh sa de i.” Ti in Alexander Mc Leigh in ngan i.Mizoram a tlawn heh kum 1900-1910 karlak dung i thai tuhin mi hrekkhatin rel i.
Pau Cin Hau le apawlte in ramhuai laukul ngaingaite hnawtin na tamngai per tlangde i. Thil hrekkhatah Krihfate tidan hlun ai,ahrekkhatah hlandan hlunde i.Biakinn satlang ai,zarhkhat velkhat khawm le, saw khai ngende i.Ciatih inapuikhalkhaw ramhuaite hnawt ben fangin zudingin umtlang de i. Thihhnua thute,rauhla lam thute le minung nundan pha/mawi zirhdun hang lemlo ai, minung nuncakhnak lamlek ngaisung de i.
Apawlpuite khiah Pautinhau in Pathian hnenai athu dawngdan bangbang in fehpui de ai, ciaheh amahte culture thawn remtuhin fehpui de i.
A pawlpuite in ‘sang’ tihnak biakinn sa le, thu reltu ‘Lai sang’ nai ai, laingantu ‘Lai at’ nai fawn i.’Upa’ ril le, apawlpui ‘Pawlpi’ tihnak khiah ‘Upa’ te in uk ngalsio de i.
Pau Cin Hau in “lai ngandan heh Pathianin i pe i”, tin rel i. Sun le zan zomzetin ruat thliahthlo ai, Taluk lai bangin pongkam fangkhat niuniu in cafang bawn i. Aw sang le aw niam hrangin cafang pahnih in panga tian um thaihnak cafang 1050 lo bawn suak i. Amah roriin laibu bu 6, I bu, Min bu, Dongleng bu,Lusia bu, Thatuk bu le Thiamzing bu te khai lo bawn hnelhno i. Hetihbangai cafang bawntu a i manin Laipian ( Scriptcreator) tiin Pau Cin Hau khiah miin ko de i.
Hemi cafang bawnhnak heh 1930 dung fangin a fapa Siankhawcin le a tu Thangliankham ,Cinkhawgin le Pauzadawng te in Type writer le Printing Press in nem thil tuhin lo bawn sal ai, cafang 37 lek in lo rem sah lio i. He cafang hmangin Bible Society te in Bawi Zisuh ” Tlang vumai thu relhnak” khiah a culhnakin lo nem sah i.Inapui Pau Cin Hau ai cafang bawnhnak heh mipui in a hmangtu lo tlawm/tem ngai i.
Pau Cin Hau pawlte heh mite in ‘Law-ki’ ti in ko de ai, a umzia tu ‘Lailung mi’ ti hnak i. A san lai ah tu member pung cak ngai ve i tuh i, zaiman tifangin zu dingthil man khai i thai tuh i. Tiddem khua in sak, hlang, ziat le vai lam hlai ah Manipur le Mizoram Tiau ti hlûn tian a hnuahluntu lo tam ve ngai i. A hlaice in Paite khuasa hmunah lo tam ve i. Zanniat ramah khai Pau Cin Hau biakhnak heh 1913 kum ah lo hleng pan ve i.
Pau Cin Hau Laipian biakhnak heh a ding sawng/ngawm niu pah Baptist kohhran te thawn engteng dun deuh ber ai, a hnuata lamah kohhran dangdang thawn khai engteng dun sinsin i. A rai deuh hnua ah tu kohhran hrangah hnawksak tlak um ben nawn lo hang ai, a tha nau rianro ai, 1975 kum dung fangtu Tiddem khua cingkim ah tlawmniu lek tang hang i. Zaikhai itale, Zo/Lai cikiak laksongah Pawl dang ding hmasaber tu i manin hnikhnaih tlak ngai ve i. Cen, a hnuata lamah dingsuak benlo in dit rianro napuikhalkhaw, cafang thar a bawnben hnak manin Chin /Mizo/ Kuki history ah a hming pai nia um tuh nawn lo hang i.
Reference:
-Zoram encyclopedia.
– Hniar Cung: Zanniat Thuanthu bu.
-Gogin: History of Zomi.
History of Christianity in Chin Hills, Halkha,
….
Ciahmuahin a comthai ang berin ngan ii sing.
Siartu veksen vumah ning linghnak lo kâu tu ve seh.
A mah zuk le cafang a bawn hnak tu, Pau Cin Hau ti in Google hmangin sear tu ih lai tawk tuh ngawn ii si.
Cialo mi hmingthang aisu thu ning ngansah leh thio ngang? Ning daih lekhaw i rel leh tu ih law.
Bawi Sawn
Camkhat : lo vai rutro
info 
Web Admin