Nov 17, 2011 nia ah US President Barack Obama in “Asia-Pacific ram ca US heh thazang ii, hetah umh tuh ii sing” tiin Australia Parliament ah Beijing (China) in hin hlen tlak ponka pong ii.
Obama in Australia hlanglam ah raldohnak vanzuang le Maring ralkap 2,500 kuat tuh ai amah te rualpui ram te thawn raldodan zir tlang hnak ca i tuh tiin reel zo ii. Hetin US in China a lau lo thu phuang ii.
China in US cangvaidan heh roh ngai in siik kul tuh thu phuang ve ii.
Obama in Asia-Pacific ram ah US in raal lak an humhimhnak ca suup tuh lo thu reel ai “Asia-Pacific ram song ah US heh veksen ah umh” tiin reel beet ii.
1990 kum dung pah nikum tian China in humhimhnak ca sumpai heh $160 billion hmang zo ai tun naai ah China in Radar in pom thil lo hnak vanzuang te khai hmang cuul thu te le vanzuang phurhnak raldohnak lawng te khai hmang cuul zo ii.
Nov 16 nia ah US White House le Congress in China in raalthuam le humhimhnak lam a khangso daan heh US in roh ngai in kham dun tuh daan ruat kuul thu phuang zo ii.
Tun ah Australia thawn US in lungkhimtlanghnak a bawn heh ralthuam le humhimhnak lam ah China a norhnak pakhat i fawm ii.
US in tun heh Japan le South Korea ah raalkap thawng tam roh dah zo ai tun kum 10 song ah US in Asia khawmual ah roh ngai in humhimhnak le ralthuam ah ben tawk in dinhmun khuar teng ii. Australia heh China an 5,500 mile dung ah umh ai US ca Australia saklam ram an China tawng tuh lekhaw a nong deuh maan hmun remcang pakhat i fawm ii.
Hmai kum an U.S Marine 250 heh Australia saklam ah vaak tio tuh ai a rai hlan ah raalkap bu 2,500 dah beet tuh ii. Obama in Asia-Pacific ah hmun khuar zo ai Europe, Middle East le U.S ai a raalkap te khai tlawm ruai thai dinhmun ii.