Tuesday, 22 November 2011 14:48 Tun Tun News – Mizzima News
Kawlram Phungki pawlkom pakhat All Burma Monks Alliance (ABMA) in Nov 22, 2011 nia ah National League for Democracy (NLD) in Kawlram by-election ah tel lin acozah dinhmun cuh tumhnak thula ah lungkhim lo hnak Laai suah ii.
ABMA ai laai ah tun hlan ah NLD in suahhnak Shwegondine Declaration thawn kalh duh ai tun ai Kawlram dinhmun thawn remcang lo thu khai phuang ii.
He laai ah tun ai Kawlram heh ramsong ah raaltho ai minung dikhnak le covo umh loin bawn le politics lam, sumpaihnak le tlanglenghnak lam ah tun tian zalenhnak umh lo ai Phungki te khai thu reel thil hnak dinhmun pe lo tiin ngan ii.
ABMA heh 2007 kum, September hla ah Kawlram ai Phungki thawng tam roh in acozah vum ah lungkhim lo hnak lar ruai in lamvaakhnak bawn awng ai acozah in tam ngai pom ai reek hnak khai tuar in ram pua lam ah tlaan te in dinhnak pawlkom ii. Pawlkom hmunpui heh New York ah dinh ii.
Novermber ni 8, 2011 nia ah NLD Central Committee ah member tam sawn in tun kum Kawlram by-election ah tel tuhin lungkhim ai election ah party dang te zuam tum ve ii.
NLD in April 2009 kum ah Shwegondine Thusuah (Declaration) ah Ralkap Acozah in 1990 kum ai Election khiah lungkhim tuhin, politics maan thawngto te suah tuhin le 2008 kum ah acozah in bawnhnak Daan (Constitution) heh rem tuhin laai suah awng ii. Cia lai ai a daihhnak te tun tian famkhim lai lo ii.
NLD in Kawlram election ah tel tum leh thula ah NLD member hrekkhat in lungkhim lo ve ii. Tun hlan ai NLD dinhmun bangin kho hlen tuh daihtu te khai umh ii.