Chin National Front (CNF) le Kawl acozah in remhnak bawn tuh hang tiin Khonumthung News in phuang ii.
CNF thawn pawlkom dun Kareni National Progressive Party (KNPP), Karen National Union (KNU), le Kachin Independence Organization (KIO) te khiah November 19 nia tawkdunhnak nai zo ai January 2012 kum ah Chin state khawpui Hakha ah tawkdun leh tuh ti ii.
Tun naai ai Kawl acozah thawn tawkdunhnak ah CNF lam in Zing Cung (CNF President), Sui Khar (Ethnic National Council Secretary & CNF Joint General Secretary) te thawn Kawlram le Thailand ramri hmun khat ah tel ve ti ii. Cen, acozah lam in Aung Min (Railway Minster) le Dr. Tin Maung Htan (Advisor) le Dr. Khaw Yin Shwe te tel ai he meeting heh Ethnic National Council (ENC) in hoha ii.
Acozah palai Aung Min in tun ai acozah thar in ram song ah remhnak umh a daih hnak thu te reel ai National League for Democracy (NLD) party khai tun tun by-election ah tel tuh thu te reel le hetih bang i maan pawl dang te khai remhnak reeltlang tuhin a daihtlang thu reel ii.
CNF ai General Secretary Paul Sita in “Remhnak bawn tuhin hmaikum ah acozah thawn tawkdun tuhin CNF in lungkhim hlen” ti ii.
2007 kum ah acozah hmasa SPDC (State Peace and Development Council) thawn CNF heh Kawlram le India ramri ah tawkdun awng zo napui lungkhimhnak bawn ben lo awng ii.
CNF le Kawlram acozah in 2012 ah tawkdunhnak ah Chin state ai acozah upa te khai tel tuh ai dodunhnak com tuh thu (Ceasefire) reel tlang tuh tiin phuang ii.