China ram khawpui Beijing ai University tlawngta fenu te in amah te ai nupang-ci (Ovum) zuar ii. Hebang sumpaihnak heh tawlreeltu agent umh ai cia te in University tlawngta fenu te song in a dung 4-5 feet, tiksa le ruangrai mawidaan, thinlung le tlanglengdaan te, a hlaice in mit tial nai siik in cia nupang te ai Ci (Ovum) heh lang in nau nai thil lo te hnen ah zuar sah de ai University tlawngkai nupang te ca sumpai sihnak remcang roh ah cang ii. Agent te in Beijing ai Peking le Tsinghua University ai fenu te khiah a tam ber zuar sah ii.
Agent te le University tlawngta fenu te heh hotel le rong aihmun dawr te bang ah tawkdun de ai fenu te thula zong de ti ii.
Hetih bang ai sumpaihnak heh daan lo ii. Inapui sumpai tam ngai ngah thilhnak i maan nupang te in bawn tio ii. A hlaice in internet hmang in nupang-ci daihtu le zuartu te heh dawrdun de ii. Facebook website pakhat ah mi pakhat in nupang-ci a daih thu than ai, Peking University le Tsinghua University ai fenu tlawngta i lo lekhaw buaipui hiam lo tiin than awng ai, Yuan 30,000 (US$ 4,727.39) tangka pe ngam ti ii.
Hetih bang ai nupang-ci zuar tuh te in a hmasa in tiksa nuncakdaan siik fiang hmasa ai ceta a pha te ian lang de ii. A hlaice in nupang khai kum 22 le 26 karlak University lawngta fenu teng teng daih ii.
Wang Chao (Pseudonym), nupang-ci petu le nau nai thil lo te ca napertu agency ai, in kum riat song he na per awng ai nupang-ci daihtu mi menma te in khai tangka Yuan 50,000 – 100,000 (US$ 7,878.98 – 15,748.23) tian pe ngamtu tam ngai tiin Beijing News ah reel ii. Inapui ci naitu nupang in tangka heh Yuan 5,000 (US$ 787.34) dung ian co de ti ii. He na heh acozah daan i lo maan hebang bawn tuh fangin thupruk niu in Agent te in hospital (Sizung) ai doctor, nurse le a kiiltu te hnen ah sumpai pe kuul maan tangka tam ngai kuul de ti ii.
Tun heh China ram ai mipui 100 ai 10 dung heh nau nai thil lo ii. Hetih bang ai nau nai thil lo tam maan nupang-ci pha lai hiam ai nau nai hiam tam roh ii. Nupang-ci zuar ai sumpaihnak bawntu heh China ram song ah mi 10,000 dung in per tlang ti ii. China ah daan bangin nupang-ci ngah tuh har roh maan hetin daan loin bawn kul ii.