Rev Lian Khua Thang thawn Dt. 21 Nov 2011 nia ah www.zanniat.com ai palai Salai Nai Lian Thang in Interviewhnak nai ii.
Online in Video Interview siik thil ii.
www.zanniat.com in Rev. Lian Khua Thang Interview-hnak
ZN = zanniat.com
LKT = Rev. Lian Khua Thang
ZN: Hello Pastor
LKT: Hello
ZN: Pastor, kaimah heh zanniat.com in ing ai, caan na naihnak song in zanniat.com hrang caan kin zawn ben nga sim?
LKT: Caan nai hnak te a cang thilber in hmang ?lang zuam tum ing.
ZN: Tun bang na caan te kin zawn tuh thu za maan zanniat.com hming in anghnak thu na saan ing. zanniat.com in kin mi te song in milar le Hmingthang te Interview-hnak cang thil tawpin zuam ai, nai tlang tuhin zuam tlang ing ai; Pastor, nangmah heh a vaihnih hnak Interview kin ngah ii sii. Pastor, kin in na hming kin ling daan heh Rev. Lian Khua Thang tih’n na ling tlang ii ing ai hming dang tang nai aw sim?
LKT: Hming dang nai lo ing.
ZN: Pastor na sulphun hmun, nu le pa hming le Pastor din hmun in Pathian na naper
hmasaber hmun te kin rel thil ol aw sim?
LKT: Suakhmun, Falam peng, Simcing; Pa Tai Hmung le Nu Sung Thluai te Fapa ing ai Pastor dinhmun in na i per panhnak tu (Myaunghla Baptist Church,) Myaunghla khua Kalay Township ii.
ZN: Pastor-naper thok kum le naperhmun kin ling ruai thil aw sim?
LKT: 1977 kum March 7 in Pastor naper pan ing ai Myaunghla khua, Myaunghla Baptist Church ah per thok awng ing.
ZN: LBA dinthoktu ti’n na ling tlang ing ai LBA ding daan thu tlawm lai kin rel thil aw sim?
LKT: He thu i zawt man i aang ngai ii. LBA kin dingdaan tu Kalay Valley Baptist Association, Kalay bial ai Tidim, Falam le Halkha umh tlang ii ing. 1986 kum ah Hakha te in Tidim Pon ling lo ing ti ai kinsuak sah awng ii. Cen, 1990 kum fangin kin calaai i tuhseh, kin pon itu seh, Tidim te thawn umh tlang maan kinmah neuin umhtlang singlai; Calaai, Pon, Sunday School lam ah le a zaizongza in khai khangsohnak nai tuh ii sing ti’n ruat tlang ai Rev. Tha Biak, Rev. Run Helh Ling le Kaimah Rev. Lian Khua Thang thawn meeting nai tlai ai, thukhamdun ai, “Aisu bangin khai thukham pelh tuh lo” ti dun ing ai, upate ko in thu ruahdun ai 1990 kum ah LBA ding pan ii ing.
ZN: Pastor, na ponghnak songin Calaai khai tel i maanin Calaai thoktu khai ningmah pah thotho i aw sim ih?
LKT: Falam Calaai tihnak heh cia tan hampanhnak ii. Falam Miphun aisu in khai pan awng lo ii maanin kinmah in pan awng ing le Saya Tha Biak te in kin konghoi awng ii. 1996 kum dung fangin Falam Miphun te in “Pha ii” tin ruat ttlang le Falam Calaai tiin suak ii. Ahlan ah tu Kalay
Valley Baptist Association ah kin um lai ah khai Calaai tu nai aung cia ii sing ai Secretary kum hnih le President kum li per awng zo ing. Cen, Treasurer heh kum 14 per awng ing, Falam calaai song ah.
ZN: He bangin Falam Calaai thu te kin rel maan zanniat.com in aang hnak tampui nai ii ing. Cen, LBA GS hmasaber per u ti’n khai na za man GS naper lai ai harsahnak le naperdaan te kin rel thil ol aw sim?
LKT: LBA ding thok lai ah mipui te le upa te daihsakhnak in GS a hmasaber per ing ai kin naper lai ah thil tampui harsahnak te tawk ing. Zaimaan tifangin LBA ding thok lai i maan in midangte in “He te heh naper ben ngaingai nga im, rinsan tlak ngaingai nga im, kin konghoi ben ngai ngai nga imn..” ti’n kin hlir ii (mawh siihnak pai). Cia lak songah “Pathian rinsan bang nga sing” ti’n tha be duun kongin le Bawipa dian rinsanin (Bawipa lawng rinsanin) tihnak Moto awhin Falam miphun hmun khat neuin feh ttlang tuhin sawm dun ai, mi hrekkhat pawl in kin umsin lo maanin Kalay Valley ah khua kua dung tang ii. Inapui le LBA in kin ding pan ai, khua sawmnga le Church (52) in pan tlang ii ing. Kin hampan lai ah kin harsa ngai ii. Kalay Valley in tangka pia ngai bang khai kin pe lo ii. Bungbel khai kin pe lo ii. Inapui khaw Pathian rinsanin feh tlang ii ing ai kin thok nia pan in tohkham nai loin bench pakhat ah to tlang ii ing ai a hmasaber ah President Rev. Tha Biak, Sec kaimah Rev. Lian Khua Thang, Asst Sec Rev. Biak Cung Nung, E&M Director Rev. Tha Nai Thang, Youth Sec Saya Lian Mang, Rev Sec Saya Than Kap, Women Sec Daw Van Dim te thawn per tlang ii ing ai kin per kum ah aisu bang khai kin Hlakha (Salary) a khim in ngah lo ii ing. Hlakha (Salary) a hrek dian ngah tlang ii ing. Ciami kin per kum ah Pathian in kim Hmuifu ai innhmun le Motor te khai lei ben, tlawng khai bawn ben tlang ii ing. Cetin LBA heh tun bangin ZBC ram ah Association 26 umhlak song ah rinsan hnak, a thupui ber le sumpai lam ah khai tamper naitu ah kin cang ii.
ZN: LBA heh tun bangin khangsohnak zai zai man ii, LBA in Moto nai aw sim ih?
LKT: LBA tun bangin a khangsohnak tu Pathian kilkhawl hnak man in ii le LBA ai Moto tu (Bawipa ian rinsanin feh tuh) “minung rinsan lo in Pathian ian rinsan tuh” ii.
ZN: Taungphila Baptist Church heh Pu Thang Cin le Pu Hlai Hmung din hnak tin ling tlang ii ing ai Taungphila Baptist Church ah Pastor pertute song ah a pazaihnak ii si?
LKT: 1914 kum ah (1) Pu Thang Cin, (2) Hlai Hmung (Parte), (3) Tuah Hrang, (4) Saya Ing Lian, (5)1954 kum an Rev. Kip Vum, (6) Rev. Hrang Tin Khum, (7) 1986 march 7 an kaimah Rev. Lian Khaw Thang ing.
ZN: Malaysia Zanniat mi te heh zai bangin kin hmu pa si?
LKT: Malaysia umh Zanniat mi ning hmu fangin lung i sia. Zaimaan ti fangin kin ramah mi kin tlawm te hang i man ii. Khat lam ah tu Malaysia umh Zanniat mite Pathian thu thawn ning nung maanin ning aan ngai ing.
1. Khat lam ah tu hoitute rinsan nuam lo hnak te hmu ing, poi ti ngai ing. Cen hoitute ah thazang lang tlang tuh sawm i nuam ii. Pathian rinsanin mah miphun le kin laa, kin pon, kin nundaan kin laai (Calaai) khai “Sangtu ing” ti ruathnak thawn phuur ngaiin le ngam ngai in hoidun tuhin sawn i nuam ii. Cen, pakhat le pakhat pong sualhnak ngaithiam dunin le lungrual ngaiin hmailam nor tuh le Pathian heh a pakhathnak ah dahin konghoi dun tuh sawm i nuam ii. Cetin, kho ngaiin ding tlang thil tuh ii sing.
2. Sanginn (Biainn) te i siik fang Zanniat mi te khangso ngai hnak te hmu ing. Zung khai Computer Internet te thawn khim thip thep in ning hmu maanin khangso lam pan ii si tin ning hmu ing.
ZN: Kin ram ai Zanniat mi te umhtudaan te nah mu daan te kin rel tuh in na sawm ing. (Kin ram ti hnak tu Lai Ttlang, Kawl rawm umh mi kin zanniat mi)…
LKT: Hmasaber in Lai Tlang thu Zanniat ram ah Camping, Crusade tam ngai nai i sing. Aang kuul ngai rual rual in Lungsia kul ii. Zaimaan tifangin Pathian thu ah kin nung lo man ii. Pathian thu daih kin tlawm ze ii. Miphun dang te tu Pathian thu ah a haalin hal tlang ai kin tu Pathian thu daihtu, haaltu kin tlawm ze ii. Cen, pehnak lam kin tlawm ze ii. Mi peng dang te siik fangin Zanniat ram thawhhlawm kin tlawm ze ii. Kim mipum le kin ram tu tam ngai napui khaw, pehnak lam kin sam ngai ii.
Pahnihhnak ah Kawlrawn lam rel nga sing khaw, tangka ah kin buai ii. Zu le sa ah kin tam ii. Pahnihhnak tu Pawl ah kin buai ii. Kaimah pulpak ai rel i hiamhnak tu, pawlpui heh thupui lo ai Pathian heh thupui sawn ii ti i rel nuam ii. Cen, kin minung te khai kin fim hlen ii, thiam khai thiam hlen ii sing, mi cam hlen ii sing. Zaimanin mi hnia ah umh ii sing ti ai i hmuhnak tu Pathian thu kin ling lo ze man le Pathian thu bang a nung kin tlawm ze man ii. Sawm i hiamhnak tu Pathian ah nung tlang, Bawipa Jesuh heh a hmasa ber ah dah tlang nga sing ti sawm i nuam ii.
ZN: Zanniat Gospel Concert ah “KHO NGAI IN DING TU IH” heh committee in rel tlanghnak maw? Zaimanin “’Kho Ngai In Ding Tu Ih” ti hnak, kin rel sah thil aw sim?
LKT: A vaikhathnak Gospel Concert, “Kho ngai in ding tu ih” ti hnak tu Committee in ril tlang
hnak ii ing. “Kho ngai in ding tu ih” tihnak san tu Pathian ai kin pehnak pon, mizia, miphun
he pai tuh loin “Kho ngai in ding nga sing ih, ding tu ih” tican ii.
ZN: Concert (2) ah “Kut awngzawm in” tiin tar thio ii singkhaw cia tang zai tu san ii? Kho ngai in ding tu ih tihnak ai a pek hnak i maw? Thu dang ii?
LKT: “Kho ngai in ding tuh ih” ti hnak thawn a peh i sing. Kho ngai in ding tuh fang heh “Mah leek in ding thil lo ii sing, khat le khat bawmdunin pehzawm dunin” ti hnak ii. Kho ngai in ding tu ih tihnak ai thu peh ii.
ZN: LBA ding lai ah calaai khai ding maanin Zanniat laai khai cia tan ding pan hang ti’n lang thiltuh ii sing maw? Zai manfangin Falam calaai heh Lairawn ah 1996 ah Falam calaai ding pan bang in lar man ii. LBA in calaai dingpanhnak tu 1990 kum ah ding pan bang lar man ii.
LKT: Calaai heh FBA lam te thawn kin kophnak heh AD 2000 lam fang i lai ii le, LBA calaai tu AD 1984-1985 kum in pan zo hang ii ing. Inapui khaw FBA lam te thawn pehdunhnak nai lo ii ing ai Kalay Valley te ian ii ing.
ZN: Zanniat mi lak ah pa ber in ruat na kin i manin Zanniat mi te hrang ah ponkam/thucah kin hlup tuhin na ngen ing.
LKT: Kai tu tarlam i pan hang maanin na khai per ben tuhlo maanin ponkam cah i hiamhnak tu:
(1) Pathian rinsan
(2) Sanginn (Biainn ) ah Kawm zuam nga sing
(3) Mi lau ze hlah sing ih, mi khai kawm ve nga sing
(4) Laivum ah zai thu umh ii? Zai kin kull ii? Kin umh hmun heh kon teng ah umh ing ti lingin Fim ngai le rinsan tlak neu in umh nga sing
(5) Kin umhhmun ten ah mah le mah sii dunin harsahnak te bawm dunin a fim deuh te in zai ling lo te kilkhawlin bawn dun tu ih
(6) Kin naperhnak hmun ah rinsan tlak neu in per ai mi ai rinsan tlak tuh in umh in mah le mah khai rinsan dun tu in.
(7) Hnuataber ah cah i nuamhnak tu, kin hlenghmun cang kin umhhmun cang ah mifim bangin fimin le mi zir bang zir mi thiam hnak thiam ve nga sing. Computer I tu seh, ttlawng phun sang ii tu seh, cen, kin thiamhnak, kin Fimhnak te heh innsungsang, kin miphun hrang ah hmang tlang tu ih. Pathian Hmuifu ning hnen ah leng tu seh.
ZN: Pastor nangmah naihla. Caan nai lo songin zanniat.com thu zawthnak te kin saang man kin aang ngai ii. zanniat.com hming in aanghnak thu na san ii ing.
LKT: Kai mah khai ii aang ngai ii .
info 
Web Admin