- UNFC
United National Federal Council (UNFC) in thu sah le President Thein Sein hnen ah tun bang ai acozah le ralthuam hmang ram nai miphun te karlak ah remhnak tiin a thil bawnhnak te heh Kawlram song ai miphun te karlak song ah buaihnak suak ruai tuh sawn tiin phuang ii.
UNFC ai General Secretary Naing Han Tha in acozah in remhnak a bawnhnak heh miphun dang te thawn khekdunhnak ah kin hoi tuh sawn tiin reel ii.
Naing Han Tha in:
“Amah (Kawlram acozah) in Kawlram song ai miphun pakhat le pakhat ai kuulhnak te bang dun lo maan ti ii. Cetin UNFC song ai member te heh pakhat hnua pakhat acozah in remhnak bawn tuhin sawm le kinmah song ah kin kheek ruai ii. A hnawtaber ai tumtahhnak heh amah te ngaanhnak daan ah remhnak bawnhnak miphun/pawl te heh Border Guard Force (GBF) ah cang tuh tihnak daan nai ii.” tiin reel ii.
UNFC ah Kachin, Karen, Kareni le Mon miphun te tel ai acozah thawn remhnak bawn tuh daan thula heh tun hlan ah reel tlang zo ii. Inapui remhnak bawn tuh daan fumfe in reel ben lai lo ii.
UNFC in, acozah in politics sawn in remhnak bawn tiin phuang napui Kawlram song ai miphun te heh raalkaap le raalthuam hmangin tawng hlen tiin phuang ii.
UNFC heh February 2011 ah dinhnak ii, Kawlram miphun paruk (Kachin Independent Organization, Karen National Union, New Mon State Party, Shan State Progressive Party/Shan State Army, Kareni National Progressive Party le Chin National Front) te in dinhnak pawlkom ii. UNFC heh tun kum November hla song ah member 12 in khang ii.
Palong State Liberation Front, Lahu Democratic Union, Araklan National Council, Wa National Organization, Pa’O National Liberation Organization le Kachin National Organization te heh UNFC ah dinhmun bangran in umh tlang hang ti ii.