Kachin state ah Kawl acozah raalkaap in khua song mi pakhat reek ai Kachin khua 20 hnakin tam sawn khiah lau in tlaan ii.
Kawl acozah in a ram song mi te heh raalkaap hmang in kaap ai bomb kaaphnak ngaw roh roh mortar tiin kohnak te hmang in ninghiohnak tel loin Kachin state ah kaap a ram song mi te kaap ii. Tun ai Kachin kaaptu heh Light Infantry Battalion (LIB) 73, Division 88 hnia ai umhnak in kaaphnak ii. He kaapdunhnak ah acozah raalkaap heh 400 vum tel ai bomb kaaphnak mortar heh 120mm le 60mm te pawl hmang ii.
Acozah raalkaap te in Kachin state song ah raalkaaphmun heh pali (4) dinh beet ai a hiang ciingkim ai mipui te khiah roh ngai in raalkap camp ca na per ruai dek ii. He tih bang ai Kachin le acozah dodun maan Kachin mi 3,000 hnakin tam sawn heh raaltlaan in vaak ii.
November ni 18, 2011 ah acozah raalkaap LIB 73, Division 88 hnia ai te in mortar 1200 te hmangin KIA (Kachin Independence Army) Brigade 3, Battalion 15 area ah khiah kaap ii.
November 19 nia ah acozah raalkap 200 hnakin tam sawn heh Kachin state ah Hakawn khua niu ah kawi ai he hmun ai khua 20, Hpakawng, Bumwa, Lamaibang, Kadaw, Mandau, Matang, Mamda, Kadaw, Edin Yang, Zinlum Gaji, Pranghkudung, Lawmun, Lawdan, Kawngja Yang, Hkangdung, Kungpi le a dang khua li (4) te khiah lau in amah te khua hlumin tlaan sek ii. He khua hrekkhat tu acozah te in mai in taai sek ii. Mi 3000 hnakin tam sawn raaltlaan in umh zo ai aihdin le umhnak tuh harsa in umh teng ii.
November 16 nia, 2011 ah acozah raalkaap in mortar 120mm hmangin vai 3000 dung kaap leh ai Pranghkudung khua hiang khai kaap ngah ii. Cen, he hmun ai naupang tlawng hiang ah khai bomb tlok ii. November 27 nia, 2011 ah raalkaap 300 dung, Division 33 ai te in Man Chyam khua, Man Si Township ai heh mai taai sek ii.
Acozah raalkaap in Kachin lovai mi kaap
Nang Zin Tawng, kum 52, heh November 21, 20111 nia ah acozah raalkaap te in kaap le thi ii. He nia hlah ah acozah raalkaap te in he hmun hiang ai KIA te kaap ai vaak kongin lofang ciinghmun ah hleng le hetah he Kachin putar heh raalkaap te in tawk ai kaaphnak ii. He putar ai innsang le khua ai mi te khai acozah raalkaap lau in tlaan sek ii. He Kachin putar in fapa pahnih (2) nai ii.
News: FBR