Aung San Suu Kyi le Taluk ram Palai (Chinese Ambassador) te in Rangoon ah tawkdunhnak nai thu Taluk (China) ai foreign ministry in phuang ii. He te pahnih heh bulpaak in tawk tun tiin Reuters thuthang in phuang ii. Inapui zi kom ah Suu Kyi le Chinese Ambassador te tawkdun tihnak phuang hiam lo ii.
Tun bang ai Kawlram acozah dotu NLD thawn China acozah heh tun kum 20 song ah thupui ngai in a tawkdunhnak a vai khathnak cang ii.
China ai foreign ministry in acozah palai poimawh roh heh Kawlram tlawn tuh tiin State Councilor Dai Bingguo in hmai zarh song ah tlawn tuh tiin phuang thu phuang ii.
Tun bang ai tawkdunhnak heh Nobel Peace Prize laurette Aung San Suu Kyi in sawmhnak maan China in acozah palai a hnen ah hlathnak tiin phuang ai, China palai hming heh Li Junhua tiin reel ii.
Reuters thuthang ah Suu Kyi palai Khun Tha Myint in a phuanghnak tu he te pahnih heh December 8 nia ah, Suu Kyi inn ah nazi pakhat song tawkdun ti ii.
China le Kawlram heh tunhlan pah nong dun ngai in na per tlang napui tun kum acozah thar in China thawn pertlanghnak tiikhamhnak (Dam) thula heh com ruai lio maan China le Kawlram napertlanghnak heh tlawm niu in muang ruai ii. He tiikhamhnak bawn suak selai hetah suahhnak maitha (Electricity) a tam sawn heh China ah kuat tuh hnak ii.
China in Kawlram ah thil dang tam ngai sumpai hmang ai cia te song ah ramsong ah thil bawnhnak tam ngai tel ii.
Tun naai ah U.S palai Secretary of State Hillary Clinton in Kawlram tlawn thula maan Kawlram le U.S heh nong dun leh ii.
Kawlram in China le U.S heh kontin naperpui zianzo tuh tihnak hlir tlang pha tam ngai ii.