NLD in acozah thar ding hnua ah byelction ah tel tuhin lungkhim zo le party ca palai rilhnak nai ai Aung San Suu Kyi le Tin Oo i tuhin lungkhim tlang zo ii. Hetin NLD party heh Kawlram acozah ai Union Election Commission (UEC) ah pawlkom hming dah tuhin lungkhim tlang hang ii.
He lungkhimhnak heh December 19, 2011 nia ah Rangoon ah NLD party dingtu upa 21 te thawn meetinghnak nai in lungkhimhnak ii. NLD hotu pakhathnak heh U Tin Oo ii ai pahnih hnak Daw Aung San Suu Kyi i tuhin lungkhim tlang ii.
NLD palai pahnih te khiah Naypyidaw ah feh tuh ai UEC ah luthnak bawn tuh ii. Ikhawlkhaw zaikom ah NLD palai te in Naypyidaw ah feh tuh tihnak tu phuang lai lo ii.
NLD hotu ber pahnih ril hnua ah by-election ah tel tuh party song ai candidate tuh te heh tun tian rilhnak nai lai lo ai UEC in khai zai kom ah by-election nai tuh tihnak fiang ngai in phuang lai lo ii. NLD thureltu Nyan Win in “UEC in phuanghnak iang hleng ii ing” ti ii. Nyan Win in tun election ah khai NLD in nehhnak co tuh ii tiin umhnak reel ii.
Tun naai ah Suu Kyi in Parliament ah tohkham co tuhin zuam tuh thu phuang zo ai, tun ai hleng tuhhnak Election ah amah heh acozah party do ngam tu ber i thai ii. Party hrekkhat te in NLD thawn pehzom in acozah rorelhnak ah pertlang tuh hiam tlang te khai um zianzo ii.
Tun dinhmun ah Kawlram acozah ah Election ah tel thil party heh 37 hming umh zo ii.