Bible Siar Pha I

Bible Siar Pha I

Dt. 19 Oct 2010

Bible heh a dang ca-uk thawn zaitluk in dang ii ti fangin kum 2008 lek ah Bible society te in Bible uk 28,448,325 zem i. Lai Cianghlim Thar khai uk 11,603,340 zem i. Kum siar in Bible heh a million in zem i. Bible bangin a dang ca-uk khiah kum siar in ciatih tluk in mite in lai lo i. Cen Bible bang in a dang ca-uk khiah pon dang ah let (translate) hnak um lo i.  Tunin Bible heh laivum pon (language) 2000 zolo ah let zo ii ai Bible Translator te in 2021 ngawn laivum ai pon hmuahhmuah in Bible amahte pon tten in siar thai tuhin ruat i. Mirang ponin tu a lethnak translations tam ngai um i. Kin Kawlramah Judson ai let awnghnak Kawl lai in Old Testament le New Testament um i. Cen kin Lai ponin tu Haka le Falam le Teddim pon in um i. Kinmah Zanniat ponin khai Lai Cianghlim Hlun le a Thar pa nih um zo i. Cen Bible heh ca-uk dang le dan dangte  ca-uk hnak tahin minungte in hnawmcan ai mei in khai tai  napui ai aisu minung bang in khai  hnawm ben lo i. Ciamanin Bible heh ca-uk menma ii lo ai a phun dang rori ii ti laar i. i.

Bible heh aisu in ngan i?

Bible ngantu te heh minung kut ai ngan i. Inapui ai zaimanin ca-uk dang tahin tum ce ii ti fangin a songai thu khiah minung ruathnak le puahcophnak thu ii lo ai Pathian ponka le Pathian relhnak le ponghnak thu i. Bible khiah Pathian ai ponka le thu ii manin a hmasaber nganhnak (autograph) sual thill lo i. Cen a khelhhnak khai um lo i. Cia autograph kin tihnak tunin pakhat khai nai lo ii sing. Kin naihnak tu autograph ku hnak (copies) lek nai ii sing. Cia a copies te tu minung ai copy hnak ii manin cafangkom ti bang le ngan sualhnak um thai i. Bible copies hnak tamngai um manin a veksenin santeh (compare) fangin cafangkom khelh hmun le a ngan khelhhmun ling thai i. Thutthimhnak ah tlawng saya pakhat  in a tlawngta 30 te heh President pa laikuathnak ku (copy) ruai selai, President pa nganhnak lai heh pai lio rin in tlawngta 30 te ku hnak hmuah check sio  fangin  President pa lai nganhnak thawn bang tthiah tuh i. Tlawngta pakhat in ku sual selai a veksen 30 in a bang tleuh in khelh tuh ngelcel lo i. Ciath bangin Bible khai a ku khelh hmun um lekhaw laar tuh lio i.

St. Augustine in zaiti in ngan ii ti fangin: Bible songah verse pakhat bang  a hman lo ii ti in ruat rhill lo i. Pathian in ngan sual ii ti tuh lo ii sing. A ku (copy) khelh maw, a let (traslation) khelh maw ihlahle a dikbe ling lo manin ii tuh ii, ti in ngan i. Ziangmanti fangin Pathian in khelh thill lo i.

Pathian Fapa Zisu in Pathian thu Bible khiah hetih in rel i: “¹⁷Na thuhman in amahte khiah cianghlim ruai tu. Na thu khiah thuhman i.” (Jhn 17:17).  Cen “…cen Lai Cianghlim khiah hnawm thill lo i khaw,”(John 10:15); cen  Matt. 5:18 ai, “.  ¹⁸Ziangmanti fangin  thungai in ning rel ing, Vancung le laivum bo hlan  lo,  lai fang cikber le  lai fang khethnak  a cikber te  a khim sio hlan lo in dan upadi songin pai tuh lo i. Lai fang a cikber tu i a lu (.) le lai fang khethnak tu t (-) ii le Zisu tinuamhnak tu Lai Cianghlim Hlun songai Pathian thu hmuahhmuah a cikber tian in khim tuh sio i, ti nuam i. Cen Lai Cianghlim Thar songah  Paul in 2 Timothy 3:16 songah, “¹⁶Lai Cianghlim a veksen khiah Pathian ai  pehnak i ai mi thucukhnak le mi tiamhnak le khelhnak remtu le dikcanghnak lamah zirhtu tuhin hnempui i.” ti in ngan i. Mirang pon in tu Lai Cianghlim a veksenin Pathian ai haihawh (inspired) hnak ponka ii ti i. Cen Peter in khai 2 Peter 1:20 songah, “. ²⁰Ikhalselai a hmasaber ah Lai Cianghlim songai profette relhnak thu khiah mah ruathnak bang menma ai let dan lo i ti khiah ling tuu-ih. ²¹Ziangmanti fangin profette relhnak thu khiah minung nuamhnak ai hleng thu i lo i. Ikhaselai amahte khiah Ciang Rauhla in ruai bangin Pathian  hnenin hlenghnak thu rel i.” ti in ngan i.

Ciamanin Bible songai nganhnak thu khiah Pathian ponka rori ii le kin minungte in sun le zan ti bang teng in siar zuam in by heart in khai ngah zuam lesingkhaw hnempuihnak hmuifu tam ngai co tuh ii sing.