THINNUAM NGAI ANG NGAI IN NUNG NA NUAM AWM?
Dt. 25 Oct 2010
Tun tian Pathian le Zisu le Bible thu zir tlaang ii sing. Kin Christian te in van le laipua bawntu Pathian um peupeu khiah ling ii sing. Cen 
Zisu khai Pathian Fapa ii ti khai ling i sing. Cen Bible khai Pathian ponka le Pathian relhnak loveletter ii ti in zir zo ii sing.
Cen Christian dan heh dan hmuahhmuah lakah a hman ber ii ti in khai ling zo ii sing. He kin nganhnak a siar zuam tute in zaimanin Christian dan lek heh a hmanber ii ti khai ling zo ii sing. Inapui Christian a veksenin Zisu ruaihnak hlun lo manin Christian co tuhhnak hmuifu khiah co lo i. Zisu in zai kin ruai i? Matthew 28: 18-19 songah Zisu in kin a hnuataber kin ruaihnak thu khum i: 18Zisu khai kawi ai, “Laivum le vancung ai power hmuahhmuah khiah i pe liang i hang. 19Ciamanin feh tu i lai mi phun hmuahhmuah khiah thucuk in Pa, Fa le Ciang Rauhla hming in tinim tuu-ih. ti in rel i. Zisu ai kin ruaihnak tu, mi dang te hnenah Zisu Ohnak thu kin rel ruai i. Inapui ai Christian 100 songah 95 te in tu mi dang te Zisu thu rel lo ii sing. Christian tam sawn ruathnak tu, Zisu thurel tuhin tazahaw saya nei ii lo sing? Zisu thu tazahaw tuh tu tazahaw saya te tavuan ii bang ti tuh i.. Inapui ai Zisu in he Matthew songai nganhnak thu kin pe fangin tazahaw sayate lek ruai lo in amah sang tu veksenin kin ruai i.
Ciamanin Bible songah St. Paul in kin rel i: laivum ah minung phun 2 um i. A hmasaber ah: 1. Pathian ling lo te. Mirang ponin tu natural man. 14Ikhalselai thusanglo pa in Pathian Ciang Rauhla thute khiah sang lo i. Ziangmanti fangin cia pa hnenah, Ciang Rauhla thu khiah mivoi thu bang i. Cen ling khai ling thil lo i. Ziangmanti fangin ciate khiah rauhla lam thute i.(1 Corinth. 2:14). Minungte heh kin te fangin Pathian ling lo in kin te i.
Panihhnak 2 tu Zisu khiah amahte Otu le Bawipa ii ti in sang ai ciate khiah Christian te i. Cen Paul in Christiante khiah phun 2 in khan leh thio i. A phun 2 in Zisu khiah a Otu ti in sang i. Phun khat te tu Mirang ponin spiritual ti in ko i. . 15Ikhalselai Ciang Rauhla naitute in zai hmuahhmuah thu khiah khan i.(1 Corinth. 2:15). Christian kin veksenin Ciang Rauhla nai ii sing. Zisu kin sang fangin Pathian in a Ciang Rauhla khiah kin veksen vumah kin pe i. Spiritual Christian te in a nunhnak khiah Ciang Rauhla in uk i. Ciamanin a nundan khiah midangte thawn khat lo i. (Ciang Rauhla thu a sau deuh in rel leh nga sing.) Cen Christian tam sawn tu carnal Christian i: Ulenaute, thusang khote bangin thu ning rel thill lo ai thusang kho lo Khrih songah nausen niu bangin thu ning rel kul ing. (1 Corinth. 3:1). He mi te heh Zisu sang manin Christian i. Inapui Zisu ruaihnak te hlun lo manin Ciang Rauhla in a nunhnak khiah uk lo manin a nuncan sik fangin Pathian ling lo te thawn zaikhai danghnak um lo i. Pathian ling lo te camra in thincawl le thin rimsu sualhnak bawnin um i. Pathian daihhnak tahin laivum daihhnak sawn hlun tute pawl i.
Ciamanin Pathian hmai ah minung phun 3 kin um i.
Pathian ling lo natural minung pawl
Ciang Rauhla ai ukhnak Christian te spiritual
Ciang Rauhla in uk lo Christian te carnal (khanal)
He pathum lakah a kon ber ii si?
A phaber tu Nambat 2: spiritual Ciang Rauhla ai ukhnak Christian heh a phaber i. Ilekhaw a kontihin Ciang Rauhla ukhnak Christian cang thill ii sing?
Zaimanin Zisu khiah laivumah minung bang in tolh ai thi tuar ai tholeh i? A sangtute sual hlathnak tuh in le kumzangza nunhnak ngah tuhin thi tuar ai tholeh i. Ciahlai ah Zisu in John 10:10 ah: . 10Ikhalselai ruko in ru tuh le rek tuh le hnawmcan tuh lekin hleng i. Kai tu amahte in nunhnak ngah hnak tuhin le amahte in nunhnak khiah a khim liang in nai thillhnak tuh in hleng ing” ti in kin rel i. Zisu sangtu Christian te khiah laivumah thinnuam ngai le hiam ngai in um tuhin kin bawn i.
Cialekhaw akontih in Ciang Rauhla in kin uk thill ngai? Zai bawn kin kul i? Kin bawn kulhnak tu kin sualhnak khiah sir tuhai phuang tuh kin kul i. 1 John 1:78-10: . 8Kinte in sualhnak nai lo i sing ti lesingkhaw, kinmah veve zawl ai thuhman khiah kin songah um lo i. 9Kinte in kin sualhnak khiah phuang lesingkhaw, amah khiah sangtlak le dikcang pa i manin kin sualhnak khiah kin hlat sah tuhai kin dikcang lohnak hmuahhmuah kin somsah tuh i. 10Kinte in sual lo i sing ti lesingkhaw kinte in amah khiah thudon reltu cang ruai ai a thu khiah kin songah um lo i. Ciamanin kin sualhnak khiah sir in Pathian hnenah phuang kul ii sing. Ciamanin na sualhnak khiah he a hnia ai bang in phuang tu. Laihnah le khedan lang tulai, Ciang Rauhla in na sual ii ti ai na relhnak hmuah a veksenin laihnah songah ngan tulai (nangmah lekin ling tuh manin a hmanniu in ngan tu). Ciaben fangin 1 John 1:9 na sualhnak vumah ngan tu. Ciaben fangin na laihnah khiah zik tu berh lai mei in khai tai thai ii si. Ciaheh kin pumpui haihawh thawn bang i. Kin pumpui khai haihawh lo in nung thill lo i. Um singlai camkhat in kin thi tuh lio i. Ciabangin kin khai kin rauhla haihawh (kin sualhnak sir in phuang lo fangin) kin rauhla tu thi tuh napui lo ai Rauhla thai (fruit) nai tuh lo manin a thi thawn kin bang tuh i. Thingkung khai a thai nai lo fangin a vawng tuh lek sam bang in kin khai a thai nai hlah lesingkhaw kin vawng thai lio i! Ciatih in bawn lesikhaw, thinnuam thintlong ang ngai in um tuh ii si. Ciaheh Zisu ai kin khamhnak thu i. Nunhnak a khim liang (Abundant life) tu zai i? Zai in kin nunhnak khim liang thill i? Thilri tangka sumsaw in khim ruai thill lo i; thin kin nuam ruai thill lo i. Thilri tu a hmang in bo thai sek i. Ciamanin kin tham nia um lo i. Rong khai ei kul lek lo ii sing. Ciamanin nunhnak a khim liang tu Paul in Kalati 5:22-23 songah hetih in kin ngat i: . 22Ikhalselai Ciang Rauhla songai thingthai khiah hete i: Ithnak, anghnak, remhnak, thinsauhnak, thinneemhnak, phathnak, sanghnak, 23thinniamhnak, a phateng ai nunghnak te i. Ciate lakah thukham um lo i. He Ciang Rauhla thai (fruit) heh kin taksa zuamhnak in thai ruai thillhnak ii lo ai Ciang Rauhla in kin uk fangin kin songin he thai te khiah laar tuh i. Thutthimhnak ah to meng menma le zuam hnelhno in kin raalte khiah it (love) thill lo ii sing. Ciang Rauhla thawn kin dim (uk) fang ian kin raalte, kin sawitute, zauh kin suam tu te khiah it thill ii sing.