Jan. 3 nia ah Iran ai tipuithuanthu lam luthnak Hormuz tipui ah US ai Stennis vanzuang phuarhnak lawng lut maanini Gulf of Persian tian lut lekhaw tawng dun tuh tian in Iran ai Army Chief Lt. Gen Ataollah Selehi in phuang ii. Iran in ralringhnak heh vai hnih pong tuh lo ti ii.
Iran in Persian Gulf ah US ai vanzuang phurhnak lawng USS Stennis heh lungkhim lo ai Army Chief Lt. Gen in a pong fangin “raal te ai vanzuang phurhnak lawng” tiin pong ii.
Debkafile ai ralkap lam thuthang in USS Stennis heh Strait of Hormus heh December 28, 2011 nia ah suahsan le Sea of Oman hmun ah lut ii. He hmun heh Iran in tipui hnia ah Oil le Gas a co hmun ii.
Hetih teng fangin Washington in lawng luthmun tipui ah laivum in zalen ngai in hmang tlang tuh thu te reel ii.
Iran lam in he hiang dung ah US ai vanzuang le raldohnak lawng te vaak thu video in lang ngah thu te phuang ai Hormuz hiang dung ai US cangvaidaan te phuang ve ii.
Dec. 31, 2011 nia ah Iran in hmun hla kaap thilhnak Missile heh tun ai lawng luthnak tipui dung ah kaap cul tuh thu te phawng zo ai he hmun ah a tlawm ber nazi 5 song lawng dang te vaak thil tuh lo tiin phuang ii. Inapui Iran in missile heh kaap cul lai lo ai mithiam te in Iran in he lawng tam ngai luthnak tipui heh kham hiam maan ti ii.
Jan. 2 nia ah Iran in Hormuz hmun ai tipui hnia cohnak hmun ah lailung ai tipui lam kaaphnak missile kaap cul ai cia te lak ah Qader le Nour Missile te heh hlawhtling ngai in reel ii. Qader heh Iran ai missile te lak ah American ai vanzuang phurhnak lawngpui kaap thil tuh tiin Iran lam in phuang ii.