Tun naai ah Kawlram acozah in Kachin Independence Organization (KIO) te roh ngai in lungmankhung cohmun Hpakan dung ah kaap le he hiang ai mipui tam roh thinlau in tlaan ii.
Mipui 300 dung heh tun Kachin Baptist Church sanginn, Lawng Hkang khua ah relh ai adang te khai Catholic Church sanginn ah relh tlang ii.
Tun zarh hmasa lam ah KIO in Hpakan dung ah mipui lamvaaak kham sek ai acozah raalkaap thawn kaap dun thai tiin ralring cia zo ii.
KIO lam in tunheh acozah raalkap 400 dung heh Hpakan dung ah hleng zo ai a dang te hleng beet tuh ti ii. Adang hleng beet tuh te tu a hiang ai Magway ai Infantry Division No. 88 ai te i tuh tiin KIO lam in reel ii.
Jan. 6, 2011 nia ah acozah raalkaap pawl pakhat heh Ga Matep hmun ah lamkhong ah do vut ai acozah lam mi 6 thi tiin KIA in phuang ii. He nia zanlam ah he hmun ah KIA in lailung ah bomb phumhnak puak le acozah ralkap hliam tuar te bawm tuhin a kawihnak ralkap te roh ngai in hliam beet ti ii.
Myitkyina le Hpakan karlak lamkhong heh KIA in awh sek ai acozah lam in roh ngai in KIO heh nikum June hla pah roh ngai in kaap ii.
Kawlram heh laivum ah lungmankhung tam ber suahtu ram pakhat ii. Lungmankhung zuarhnak in acozah in siah (Tax) a ngahhnak heh a sumpai ngahhnak ber song ah pathumhnak ii.