Jan. 13, 2012 nia ah tun hlan ai Kawlram Prime Minister (PM) Khin Nyunt le amah thawn ai pertlang Intelligence Official mi 100 hnakin tawm sawn heh acozah in luat ruai hang ii.
Khin Nyunt, PM le Military Intelligence chief (Ralkap thauhhlanzi lu ber) le Intelligence ai hotu tam roh heh Gen. Than Shwe acozah san ah October 2004 hla ah pom sek awng ai thawngto sek ii. Cia te lakah Khin Nyunt, tun kum 71, khai inn ah thawngto in dah ai kum 8 hnua ah tun bangin acozah thar caan ah luat ruai leh i hang.
He nia ah acozah in luat ruaihnak thawngto heh mi 651 khim le cia te songin Khin Nyunt ai fapa Ye Naing Win le Zaw Naing Oo te khai luathnak ah tel ve ii. Ye Naing Win heh inn ah thawngto ai Zaw Naing Oo tu Tayet thawnginn, Maqway Division ah to ii.
httpv://youtu.be/TlUlnZiUZSs
Khin Nyunt in Media te hnen ah 2005 kum ah acozah in Innseing ah a ko ai thu a zawt hnua tun tian harsahnak umh loin inn ah thawngto in umh hlen ti ii. Tun bangin acozah le Daw Aung San Suu Kyi te tawkdun thil hang, danglamhnak tam ngai umh thu te heh aang kul ti ii. Democracy heh laivum in hmanghnak ii le Kawlram ca thil pha ii, hlawhtling tuhin khai daih sah thu te Media ah reel ii.
Tun heh Suu Kyi in Parliament ah tel thilhnak dinhmun ngah zianzo le amah khawzuamhnak le thiamdaan bangin tun hnua lam ah Parliament hmangin acozah khai danglamhnak tam ngai umh thai ti ii.
httpv://youtu.be/OAE-suwl90Q
A fapa thawn Tatmadaw in phaantak ngai in zirhhnak pe zo le amah te ca thil pha ngai ti ii. Tatmadaw in thu zirhhnak heh thil pha ngai ti ii. Tun dinhmun ah Politics lam zai khai tel tum lo ai aisu thawn khai tawkdun tum lo ii, kuul lekhaw mipui in lingthilhnak Media te hmangin thu reel tuh tuh ti ii. Cen, tun san ah khangthar mithiam le laaithiam tam ngai suak zo le cia te pawl heh rinsan tlak ngai tiin Media ah reel ii.
Tun dinhmun ah biakhnak lam ah thinlung pe ber in umh ai hna ngam ngai in umh a hiam thu te khai reel ii.