Jan. 13, 2012 nia ai acozah in luat ruai hnak thawngto 651 song ah politics maan to tam ngai lak songin 1988 kum ai tlawngta konghoitu hmingthang Min Ko Naing khai Tayet thawnginn in suak ve ii.
Thawnginn in a suak hnua ah Media te in thuzawthnak ah Min Ko Naing in tun ai Kawlram acozah le ramhrin miphun (Ethnic) thubuai, a hlaice in Kachin ram heh thupui rohin ruat ve ti ii. 1988 ai suakhnak khangthar te in he heh poimawh ngaiin ruat ti ii. Remhnak umh vual tuhin a daih sah thu reel ii.
Min Ko Naing heh All Burma Federation of Students Unions (ABFSU) ai hotu ber i awng ii. 1988 kum September hla ah tlawngta te in acoza le ram dinhmun ah lungkhim loin a au maan ralkap in ukhnak sut lio hnua March 1989 kum ah acozah in Min Ko Naing heh kum 20 thawngto tuhin pom le 2004 tian kum 20 song thawngto awng ii. Cia hnua 2006 kum September hla ah a rualpui te thawn pom tuar leh ai Jan. 2007 tian thawngto awng ii. Hetin a luat ruai hnua Aug.21, 2007 kum ah Petrol le Diesel mang khang ze thula ah au le acozah in pom ii. He hnua ah Kawlram ah Phungki (Monk) te in September 2007 ah Kawlram pum ah au suak awng ii.
Ramhrin miphun te ca Kawlram pui thawn remhnak heh 88 khangthar tlawngta pawlkom in tumtahhnak thil poimawh ngai pakhat i ve tiin Min Ko Naing in reel ai a rualpui te thawn Suu Kyi le a party te heh per pui tuh tiin reel ii.