U.S Senator John McCain in Kawlram ah April 1 nia ai Election ah zalen le dikcang ngaiin fehpui lekhaw U.S in Kawlram vum ah sumdawnghnak lam a khamhnak te hmuah hong leh thai tiin phuang ii.
He thu heh McCain in Kawlram a tlawn hlan Vietnam ram ah a umh teng fangin phuang ii. Tun heh Senator Joe Liberman thawn Kawlram tlawng tuhin kawi teng ai U.S le Kawlram karlak thula poimawh suak thai ii.
McCain heh tunhlan Vietnam ram ai raldohnak ah U.S ai navy pilot (Lawng ralkap vanzuang mawngtu) i awng ai U.S le Vietnam heh China lak in him tlang tuhin pertlang te te kuul tiin reel ai tun dinhmun ah Vietnam ai minung dikhnak le covo thubuai maan ram 2 karlak heh thu hnawh thah thai ti ii.
“Tun dinhmun ah China heh China Tipui hlanglam ram ah U.S thawn tawngdun te te le phuncang in pertlang in China heh neh thil tuh, inapui tun ai Vietnam ai minung dikhnak le covo thula maan U.S thawn pondun har thah” tiin McCain in reel ii.
McCain heh U.S ai Republican party ai presidential nominee in 2008 kum ah tel awng ii. Amah heh U.S Naval Academy ah 1958 kum ah tlawngkai ben ai ciahnua ah ralkap ah vanzuang mawntu ii. Vietnam Ral ah a vanzuang heh Vietnam lam in kap ngah le Saklam Vietnam te in amah heh pom ngah ii. 1973 kum tian Vietnam ah thawngto ai Vietnam ralkap te ai hremhnak le zohsuamhnak phuncang tuar awng ii. Inapui hnawta ah U.S le Vietnam karlak remhnak bawntu ah cang ii.