Kawlram ai MRTV ah Aung San Suu Kyi in thu a phuang tuhhnak Video heh Kawlram ai tlawngkai ni 3 nia ah hlat tuhhnak heh a hlat hlan pah Internet ah suak zo ii.
He video heh YouTube le Facebook te, le wibsite dangdang ah a hlattu lo om le laivum ah darh sek man ii.
Video ah Suu Kyi heh MRTV studio ah NLD thantar thawn lar ii.
A thureelhnak ah zalenhnak ngaingai umh tuhin, media lam, pawlkom pehzomhnak lam le mipui thawn pehzomhnak te pawl heh zalen kuul ti ii. 2008 kum Kawlram Daan (2008 Constitution) heh ralkap ca zatek ah 25 tohkham pe cia hnak heh rem kuul tiin video ah pong ii. Kawlram in Democracy hmang thil tuhin tun ai ralkap acozah heh poimawh ngai tiin reel ii.
Tun ai a ponghnak veksen heh MRTV ah mipui in za thil tuhin media lam naper pawl in um tlang lo ii. Zaimaan ti fangin ralkap acozah in politics lam ponka heh media ah hlat siang lo maan ii.
Tun heh Suu Kyi khai April 1 nia ah by-election ah Parliament ah seat 47 lawnghnak NLD ai a naperpui te thawn cuh tum teng ii.
Tun by-election ca Kawlram song ah Suu Kyi in campaign a vaak fangin harsahnak tam ngai tawk zo ii. Feb. 24 nia ah NLD in press conference bawn le Feb. 4 le 5 nia ah Mandalay ah NLD in mipui thawn lamvaak tuh a tawlrelhnak hlawhtling thula te khai reel tlang ii. NLD in Mandalay ah mipui thawn lamvaak tuhhnak heh March hla zarh hmasa lam ah thawn leh ii. Cia bang pah in, Irrawaddy ram ai Pyapon ah khai mipui thawn lamvaakhnak heh Feb. 17 nia ah bawn tum napui acozah lam in siang lo ii. Pyapon khua song ah bawn thil lo maan khua pua ah mipui thawn tawkdunhnak bawn le mi 40,000 in Suu Kyi pon ngai in kawi tlang ii. Rangoon ai Hlegu football bualrawn khai Feb. 15 nia ah Suu Kyi thurelhnak tuhin acozah in siang lo zo ii. Acozah hming sia maan hnawta ah bualrawn dang ah siang sah leh ii.
Nitlaklam ram pawl in Kawlram in April 1 nia ah nai tuh hnak rildunhnak heh dikcang in fehpui maw tihnak hlir tlang meng ii. Acozah upa te in dikcang ngai in fehpui tuhin vai tam thah phuang zo ii. Inapui le NLD ai lamvakhnak te khiah vai tam thah acozah lam in kham sah pah ii.
info