My DigitalFC in Feb. hla ah laai suah le cetah The Indian National security advisor Shivshankar Menon in Chairman per in Delhi ah PMO meeting nai le he relcathnak ah tun kum song ah Prime Minister Manmohan Singh in May hla ah Kawlram tlawn tuh le cetah Kaladan Project ca naper kuul a poimawh pawl tawlrel tuh ti ii. He meeting ah Rih-Zokhawthar karlak ram pahnih sumdawnghnak le India in Kawlram ramri ah ‘Haats’ tam ngai dinh tuh ii. Haats hmangin ramri ai sumdawng lutsuak te kilkhawl tuh ii. India-Bangladesh karlak ah khai Haats dinh tuh ii. India Prime Minister Manmohan Singh in Kawlram a tlawng teng ah Kaladan Project bangin ram pahnih karlak motor lamkhong ceek tuh daan te khai tel ai India lam ai lampui National Highway 54 heh ceet beet tuh ai Kawlram tian in pehzom tum ii.
The Myanmar Times in Feb. 5 nia ah India lam in NGO le pawlkom dang pawl in tun ai India in Kaladan Project a tawlrelhnak heh a thil pha lo umhnak te report bawnhnak vum ah India acozah lam in tawng ve hnak thula ngaan ii. NGO lam in Kawlram ai Union Government, Chin le Rakhaing ai state government te hnen ah India in thil bawnhnak heh siik leh tuhin ngenhnak um ii. Inapui India lam in fehpui tuh pah tiin thu suah le Kaladan tipui heh kau ruai tuh ai lawng te khai Paletwa lam tian in vaak thil tuhin bawn tuh tiin thu suak pahii.
Khonumthung News in Feb. 9 nia ah a thu suak ah, The Kaladan Multi Modal Transit Transport (KMMTT) project heh Chin National Party (CNP) siik le thil pha lo hnak te pawl zingzoi thu umh ii. CNP President Zozam le Gen. Secy. Ceu Bik Thawng te in he thil maan mipui in innhmun le ram a nai nai loin umh tuh daan te, he naper maa mipui rimsu tu daan te khai zingzoi ai Rakhine Nationalities Development Party le Chin National Party thawn India le Kawlram acozah hnen ah Feb. 4 nia ah mipui ca harsahnak bawn tuh loin ngenhnak laai kuat ti ii. Paletwa an Mizoram ramri tian lamkhong ceekhnak maan Paletwa ram ah mipui ai ram acre 70 dung heh tii in dim ai inn tam ngai hnawm can thu suah ii.
Zolengthe.net in Feb 15 nia ah thu suah le, Kaladan Project thula ah Kawlram ai Chin le Arakan state lam ai mipui in zai khai ling lo ai India acozah in tawlrelhnak tihnak ihai ling lo tiin ngan ii. Chin National Party in Feb 5-8 tian he Project thu a zingzoihnak ah mipui in amah te ram ah he thil bawn tuh thula heh ling lai lo ti ii.
He ram ai mipui tam sawn heh lovaai le nga pom in nung tlang ii. Amah te ram song ah aisu te lut tuh ai zai bawn tuh tihnak khai ling tlang lo ii. He thil bawn lekhaw lo-ram tam ngai khiah tipuithuanthum tii in dim tuh le rong le umhmun harsa in umh tuh tihnak mipui tam sawn in ling lo ii.
Project Monitor in Feb. 20 nia ah thu suah ai Inter-ministerial pawlkom in Kawlram tlawn tuh le Kaladan Project heh siik tuh ai daihdan bangin Kawlram lam sawn in cak ngai in naper fehpi lo hnak te siik tuh tiin phuang ii. India lam in National High Way 54 lampui heh amah te tumtahhnak bangin a tikcu kheel in bawn tuh ai September 2014 kum ah ben tuh ti ii. Kawlram lam sawn in 2014 kum ah a ram song ah a ceek tuhhnak lamkhong sawn heh bawn ben teek tuh in sawm ai he lampui ceek tuhhnak ah Kawl pathian sanginn pakhat umh le cia heh naper laklawh ruai thai tiin reel ii. Kawlram lam in a tikcu kheel in bawn ben teek tuh ti ve ii.
A ngom ai Kaladan Project ca sumpai ruathnak:
- Site-tway lawng comhmun le Kaladan tipui heh Paletwa tian lawng lut thil tuhin kau ruai hnak (Phases 1 and 2) ca US $68.24 million
- Paletwa an India ramri tian lampui (Phase 3) ceekhnak tuh US$49.14 million
info