Tun hlan kum 5 ah Kawlram ai Yangon khuapui ah mipui thawng tam roh acozah in kut hman ai Buddhist puithiam thawng tam roh harsa tuar ai thihhnak tawk ii. Cetah mi 21 thi ai acozah sahdahpiah te khai zong dek ai pom tuar ii. 2008 kum ah acozah daan pui a thar in bawn le acozah le ram nai miphun karlak ah thisan suak in tawngdunhnak in pehzom ai tun tian in mit lai lo ii.
Hetin acozah in mipui a zonzai ruai leh pah U.S President George W. Bush in Kawlram thawn sumdawnghnak lam ah pehzomhnak kham sah le tun tian in ii.
U.S in Kawlram thawn pehzomhnak a khamhnak te lak ah visa, sumpai lam, Kawlram thilri a ram ah lut siang lo hnak, Kawlram ah U.S in sumdawnghnak bawn tuh hnak le Kawlram ai harsahnak te siik tuh te tian in tel ii.
Tun kum April 1 nia ah Kawlram in Election a fehpuidan te siik le tun hlan hnak tah tampui khangsohnak hmu ai party tam ngai zalen ngai in tel tlang thil zianzohnak te a hmu fangin Kawlram lak ah sumpaihnak le thildang ah a khamhnak te pawl khiah hong zianzo tuhin lungkhim i hang.
Election thula ah fel lo hnak tam ngai umh lak songain National League for Democracy (NLD) party in seat 45 cuhdunhnak song in seat 43 ngah hnak a hmu fangin U.S in tampui lungkhimhnak nai ii. He thula ah kum 20 lai nupang pakhat thawngto in a ram ca tuarhnak Nobel Peace laureate Aung San Suu Kyi heh upat ngai ii.
NLD in tun ai seat a ngahhnak heh 1990 kum ai a ngahhnak thawn siik tlang fangin tun ai heh a hlanta hnak ah 100 ah 7 (7%) in seat ngah tlawm deuh ii. 1990 kum ai election ah NLD in parliament ah seat 664 ngah awng ii.
Hetin U.S State Department ai Secretary of State Hillary Clinton in amah konghoihnak acozah in U.S sumpai le sumpaihnak hmangin Kawlram ah naperhnak pan tuhin, Kawlram aihdin le umtudaan te khangso ruai tuhin, politics lam ah danglamhnak um tete tuhin dawngkham hong tuhin phuang i hang.
Clinton in hetin Kawlram danglam pan napui le a ram dinhmun heh kho lai lo ai kum tam ngai rai tuh lai tiin reel beet ii.
European Union foreign minister pawl in khai zarh hmasa ah Kawlram vum ah dawng a khamhnak heh hong tuhin reel zo ai April 23 nia pah Kawlram ca Euro 150 million ($196 million) sumpai heh Kawram ai mi harsa te bawmhnak tuhin hmang tuh thu phuang zo ii.