April 21 ni ah Khartoum khua ai Gerief West Bible ai bang te khiah bulldozer in siatbal sah, Sudan Presbyterian Church (SPEC) building te khai siatbal sah ai hmun dangdang ai Pathian thangphat hmun sanginn 3 te khai siatsuah sah ii. Cen, Christian te ai miur siikhnak sizung te, pitar-putar kilkhawlhnak te khai siatsuah sah tiin he ram ai umh te in eurasianews thuthang hnen ah phuang ii.
Sudan ai Rev. Yousif Matar, Sudan Presbyterian Evangelical Church synod ai general secretary in “Tlawng ai thilri le tohkham te tian in in maai taai sek, hnuata lam ah zai cang tuh ling lo” tiin reel ii.
Muslim sheikh Muhammad Abdel Kareen in April 20 nia ah mipui ko le mi 500 dung in sanginn pakhat siatsuah ii.
Palik te in hetin mipui in Christian tlawng le sanginn te a siatsuah teng fangin siik menma ii.