9 May 2012: Chin National Front (CNF) le kawlram acozah te in tun zarh song ah remhnak bawn in tawkdun le January hla ah remhnak thupui 9 a relcathnak te pawl heh tun meeting ah fumfe sawn in reel tlang ii.
Meeting heh May 7-8 nia ah nai tlang ai CNF hotu lam le Kawlram ai Union-level ai palai te pawl thawn reel tlang ai Chin lam in ngenhnak te pawl heh Kawl acozah in khai lungkhim pui ii.
Tun ai remhnak laai heh Kawlram acozah in Railway Minister Aung Min le CNF lam in Dr. Sui Khar te in hming nemhnak nai tlang ai remhnak thu thawn siik tlang tuh hnak Term of Reference (ToR) khai thupui poimawh 9 bawn tlang ii. He remhnak ah khat lam le khat lam in ralthuam thawn tawng dun tuh loin lungkhim tlang ai acozah thawn na per tlang tuh le politics lam in Kawlram buaihnak heh rem tlang tuh ii.
Kawlram acozah lam in Railway Minister Aung Min heh hotu ber, a bawmtu te pawl heh Forestry Minister Win Htun, Electricity Energy (1) lam in Deputy Minister 2 le Border and Security Affairs Ministry, Deputy Attnorny-General, General Zaw Win heh Department of Defence an te pawl tel tlang ii. Gen. Zaw Win heh ralkap ai Northwestern le Western Command ram ca ralkap ah thunaitu ber ii. Chin State acozah an Chief Minister Hung Ngai le Col. Zaw Min Oo, Border and Security Affairs Minister te tel ii.
CNF lam in palai 17 tel ai Dr. Sui Khar in hoha ai Dr. Saai Ngun Cung Lian heh Deputy ii.