Midang uar heh a pha lam in hmang le singkhaw khangso thai pah ii.
Hetin ruat sing lai. Singapore heh miphun 3; Chinese, Malay le Indian (Tamil) in dinhnak ram ii. Chinese heh a tam ber le a lian ber, a khangso ber i napui Malay heh ram naitu ber ii. Chinese in thil ti ben ber napui Chinese hmingthanghnak tuhin China uar in he ram in fehpui lo ai Western ram bangin dinh ii. English heh Official le Common Language in hmang ai, Chinese, Malay le Tamil pon khai Official in hmang pah napui English heh thupui ber in hmang ii. Singapore te in Western te pawl khangsohnak uar lo selai tun bangin laivum ah ram lian le ram khangso ah hleng tuh lo tiin um ing.
Kin Zanniat te khai aisu, zaibang pawl uar nga sing? A khangso lo pawl uar le singkhaw cia te hnak tah a niam sawn ah umh tuh tio ii sing. Laivum, Kawlram le Chin ah aisu te uar nga sing?
Laivum huap in tu Western te uar tlak ii. Ciamaan English thiam teek tum nga sing. Science, Technology le Literature te pawl thiam teek tum nga sing khaw.
Kawlram huap in Kawl heh uar kul ii. Ciamaan Kawl pon thiam teek tum nga sing. English thiam lo miphundang Kawlram mi thawn Kawl pon ian in pon dun thil ii sing.
Chin song ah aisu uar nga sing? Kai tu Hakha le Tedim te pawl heh uar so ngai ing. Chin huap in Pon (Language) ah kin nehtu ber umh lai lo kin cang napui Chin song ah a lungrual ber ai a khangso ber tiin hmu ing. Ramdang ah Chin mi mino khangthar veksen dawn heh hleng tlang sek i hang le kin tefa san ah tu English in pon dun kul dinhmun ah kin cang zianzo in hmu ing. Ciamaan tunhnua ah Hakha, Falam, Lushai etc. tiin Chin mi lak ah Pon (Language) cuh dun in buai li hnak tah Singapore ram bangin English sawn hmang zianzo kin cang thai tiin hmu ing.
Falam tu a tlok rianro i hang. Tun naai tian Chin State heh Falam District le Mindat District tiin khan ii.
Falam District song ah:
- Falam Township
- Hakha Township
- Thantlang Township
- Tedim (Tiddim) Township
- Tonzang Township
Mindat District song ah:
- Kanpetlet Township
- Matupi (Madupi) Township
- Mindat Township
- Paletwa Township
Tun hla song ah Chin State Hluttaw meeting in Hakha District thar dinh le Hakha Township le Thanthlang Township huap ii. Cen, Tedim Township le Tonzang Township khai District pakhat ah umh tuhin acozah lam ah nor teng ii. Unau Tedim te in hlawh tling i lekhaw Falam Distirct song an Township 2 peeu tuh le Falam District ah Falam Township ian taang tuh kin cang ii. Zaimaan hetin Falam tlok rianro tihnak tu kinmah nio in ruat nga sing.
Salai Tluang Kip Thang
Ottawa, Canada
info