American Bible Society in internet ah Domain thar “.bible” bawn tuhin tawrel teng ii le he domain thar hmangin Christian lam website tam ngai website thar din thil tuh hnak in ruathnak nai ii.
International Corporation for Assigned Names and Number (ICANN) thawn American Bible Society in website domain te lakah .bible heh a him sawn le rintlak tuhin top-level domain (TLD) rori tumtah ii. TLD hmangin tun hlan hnakin online hmangin Bible thula baai nio in pehzom dun, thula kuat dun thil tuhin ruathnak nai ii.
Online lam khangso tete le website thar dinh tuh in website domain hming hmang thil hnak tlawm tete i hang maan American Bible Society khai a lamhar roh thu American Bible Society ai Chief Communication Officer Geof Morin in phuang ii.
Kum 200 song ah American Bible Society heh laivum ah Bible zem bentu ber le naper ben ber ii. Tun ai internet ah domain him roh .bible tihnak bawn suak lekhaw American Bible Society ca khai Bible lam ah khangsohnak in konghoitu ber ah cang tuh sin sin tihnak ii.
American Bible Society heh:
Laivum ah tun hlan ai Bible heh laivum in hmanghnak Englsih pon in let hmasaber tu ii le 1966 kum ah Good News Translation tihnak suah zo ai copy 7.7 million heh kum khat song in zuar ben ii.
Bible heh 1957 kum ah Audio (Vinyl Record)in bawnsuaktu hmasaber ii ai pon phun 44 in suah zo ii.
Mitcaw te ca 1835 kum ah Bible bawn sah ii.
Raltawng hmun ai ralkap te ca ralkap Bible heh Civil War lai ah bawn sah ii.
Hotel le lamvak te ca Bible koih sah ii.
American Bible Society in laivum huap in ram 200 le rambial tam ngai ah napertu nai in naper ai cia te pawl heh amah te pawlkom ah member in umh tlang ii. YouVersion le LifeChurch.tv te khai American Bible Society ah tel tlang ai United Bible Societies thawn khai per tlang ii.
“Website domain thar .bible suak tuh heh kin thin hiam roh ai laivum mipui ca thil remcang rohin hmu ing,” tiin Michael Perreay, United Bible Societies ai General Secretary in rel ii.
info