U.S le Russia in Syrian President Bashar Assad thawn tawkdun le Syria ram ah buaihnak dap tuhin le acozah thar dinh tuhin ngen napui hlawhtling lo ii.
Tlawngkainiruak nia ai conference ah U.S Secretary of Sate Hillary Rodham Clinton le Russia Minister Sergey Lavrov te in Russia ai St. Petersburg tawkdun le remhnak bawn sah ben lo ii. UN envoy Kofi Annan in Syria ram ah politics ah nuam nio nio in thleng zianzo tuhin a ruathnak bangin cang suak thil lai lo i hang.
U.S. ai official in tlawntu Clinton in, “Tun bang i lekhaw a pha lam in hmu tlang lo ai Geneva ah tawkdun leh fangin khai a thai hmupha umh tuh cuang lo,” ti ii. “Thanghna ah cetah kin khai tel thai, tel lo khai i thai,” tiin Clinton in Switzerland pan in Russia an suak ai Tlawngkainiruk nia zinglam ah Switzerland hleng ii.
Official in tlawntu Clinton le Lavrov in tun ai Syria thubuai thula ah a bangdun lo hnak te pawl heh Geneva ah cang thil tawp in rel tlang tum ii.
Official lam in Clinton le Lavrov te in Syria ai thubuai maan he ram hiang ai ramdang te ca thil laukul suak thai thu te le mi 14,000 mipui in thihhnak tawk zo thu te khai reel tlang tiin phuang ii. Tun heh Syria in Turkish ai raldohnak vanzuang khai kaap le tlok ruai zo ai a ram hiang ah vanzuang lut thil tuh lo in ralthuam te dah bial zo ii. Syria ram buaihnak maan Jordan ram khai buairuai thai ai Israel tian buai ruai thil tiin a laukul thu te reel tlang ti ii.
Tun naai Tlawngkaininga nia ah Syrian ralkap in Damascus dung ah mipui 125 reek zo ai ralkap 60 thi zo ii.
Russia heh Syria ai ralthuam langhmun ber ram le a bawmtu ber ram ii. Thuhla lam in tawkdunhnak in Russia hmangin Syria ram ah buaihnak dap ruai in Assad songkhat in tunhlan lam pah Syria ram a uknak heh tawp ruai thil tuhin umhnak umh ii.
info