CIANG RAUHLA
Lesson 3: Ciang Rauhla lehsawng (Spiritual gifts)
Ciang Rauhla lehsawngte khiah ziang ii pa? Ciang Rauhla lehsawngte khiah Ciang Rauhla in Pawlpui naperhnak ah hmang tuh in Christiante hnenah pehnak lehsawng i. Ciate khiah kin thiamhnak hmuahhmuah le zir manin kin linghnak te khai i. Mi hrekkhatte in mi thucuk (teaching) thiam i. Mi hrekkhatte in mi uk (administration) le mi ninghio (mercy) thiam i. Cen a hrekkhatte in mi ur bawl (healing) thiam ai mi hrekkhatte in profet thurel thiam i, tazahaw thiam i. Hete khiah Paul in Romans 12:6-8; 1 Khawrin 7:7; 12:8-10, 26 le Efesa 4:11 ah kin ngat i. Cen Paul in Ciang Rauhla lehsawng a veksenin ngan lo i. Cen he Ciang Rauhla lehsawng khiah kinmah pakhat hnempuihnak tuhin kin pe lo ai Pawlpui veksen hnempuihnak tuh ( 1Khawrin 12:7) le Pawlpui sang khohnak tuh (1 Khawrin 14:26) le Pawlpui khanghnak tuhin pehnak i.
Paul in kin ling ruai nuamhnak tu Pawlpui (Zisu sangtu hmuahhmuah khiah a Pawlpui member ii sing) khiah Zisu ruang pumpui ii sing ( 1Khawrin 12:27). Bawi Zisu khiah kin lu (head) i. Pawlpui khiah ruang pumpui bangin innkua member tamngai nai i.
1 Khawrin 12:12-27
12Ziangmanti fangin ruang pumpui khiah pakhat inapui ai innkua member tamngai nai i. Cen cia innkuate khiah tamngai napui ai a veksenin pumkhat i. Ciabangin Khrih khai i ve i. 13Ziangmanti fangin Judah mi le Zental mite i tu seh, mi hnenum le umlo i tu seh Ciang Rauhla in pum khat cang tuhin ti kin nim i. Cen a veksenin Ciang Rauhla pakhat ding tuhin bawn i. 14Ziangmanti fangin pumpui in innkua member pakhat lek nai lo ai innkua member tamngai nai i. 15Ciamanin ke in, “Kaimah khiah kut i lo manin pumpui ai i lo ing.” ti selai ciamanin ke khiah pumpui ai i lo im? 16Cen bil in, “Kaimah khiah mit i lo manin pumpui ai i lo ing.” ti selai ciamanin bil khiah pumpui ai i lo im? 17Pumpui khiah a veksenin mit i liang selai khuazahnak tu a konah i tur? (Zai thawn khuaza tuh i?). Cen a veksenin khuazahnak (bil) i selai, zai thawn hnim tuh i? 18Ikhalselai Pathian in a lungkhim bangin innkuate memberte khiah a veksenin pumpui songah dah i. 19Cen a veksenin innkua pakhat lek i selai a pumpui tu a konah i tur? 20Ikhalselai tunin amahte khiah innkua tamngai inapui ai pum khat i. 21Mit in kut hnenah, “Na kul lo ing.” ti thill lo i. Cen lu in ke hnenah, “Na kul lo ing.” ti thill ce lo i. 22Ikhalselai pumpui songai thanau ang innkuate khiah a kul bel innkuate i. 23Cen nautat kul ti ai kin ruathnak innkuate khiah a tam amam in zul i sing. Cen a mawi lo kin innkuate in a mawihnak tamngai nai i. 24Ziangmanti fangin a mawi kin innkuate in samhnak nai lo i. Ikhalselai Pathian in kin pumpui khiah hetih in lo bawn ai a samtu innkuate khiah a tamngai in zulhnak pe i. 25Cia khiah pumpui songah khandunhnak um tuh lo ai pakhat le pakhat sikdun tuhin ciatihin Pathian in bawn i. 26Ciamanin innkua pakhat ur fangin a veksenin ur tlang i. Ciabangin innkua pakhat in zulhnak ngah fangin innkua a veksenin ang bawm i.
Ciamanin kin veksenin pumkhat ii sing le member a nautaber in a upaber, a voi ber in a fim ber kin veksenin Pathian hmai ah kin veksenin a lian cuang le a sang cuang um lo ii sing.
1 kHAWRIN 12:27-30
27 Cen ningte khiah Khrih pumpui i si. Cen pakhat tenin a innkua member i si. 28Pathian in pawl songah he bangin dah i: A hmasaber ah apawstalte, a panihhnak ah profette, pathumhnak ah sazate, ciaben fangin ngaihsun urkul bawn thiamte, ciaben fangin mi-ur bawl thiamte, mibawm thiamte, mi-uk thiamte le pon phun caangcaang ai pong thiamte pe i. 29A vekin apawstal im? A vekin profet im? A vekin saza im? Cen a vekin ngaihsun urkul bawn thiamte im? 30Cen a vekin mi-ur bawl thiamhnak lehsawng nai awm? A veksen in pon phun caang in pong thiam im? Cen a veksenin (pon phun caang) let thiam im? Paul in kontih in sawn daih ii tifangn, a vekin apawstal ii lo, a veksenin profet ii lo, a veksenin ngaihsun urkul bawn thiam te ii lo, a veksenin mi-ur bawl thiam lo ii ti in sawn daih i.
Zai zir nga sing? Kin fimhnak kin thiam hnak a veksenin Ciang Rauhla in kin pehnak i. Kin te fangin kawngkolh in kin te ai tunai kin naihhnak hmuah Pathian in kin pe hnak i. Pawlpui sangkhohnak tuh le khangsohnak tuh ai pehnak i. Ciamanin kin pumpui khai ke le mit in khuaza thill lo ai bil kin kul bang in kinte khai Pawl songah kin veksen pakhat le pakhat kin kul i. Ciamanin a rem niu in naper tlaang kin kul i. Bawi ing ti in hngal tuhhnak um lo i. Cen ii hmel mawi ii ti in hngal tihhnak um lo i. Ciatah in Pathian sawn an in a pehnak lehsawng khiah Pathian ca in hmang tlang nga sing, ulenaute. Amen