Lesson 6: CIANG RAUHLA. Hnempuihnak
Ciang Rauhla ai ukhnak Christian te in hnempuihnak hmuifu tam ngai co ii sing. Ciang Rauhla in kin uk fangin kin thin khai kin niam i. Ciafangin pakhat le pakhat zul dun tuh ai kin rem tuh i. Laivum dan tu bawite in hnenumte heh zaikhai nam lo i. Cen laithiam ai college in degree naite in laithiam lo college degree ngah lo te heh nautat i. Cen laivum dan in um fangin American ai umte Laimite in Kawlram ah tlung fangin azici ngai in um tuh i. Inapui Ciang Rauhla ukhnak te Christiante in aisu hmuahhmuah khai nautat lo ai mah camra in sik thill i. Ciatih bangin Ciang Rauhla in kin uk lekhaw kin innsaang (family) hrangah hnempuihnak tamngai um i.
Efesa 5
22Nupuite, Bawipa hnenah i bangin ning pate kuthnia ah um tuu-ih. 23Ziangmanti fangin Khrih khiah Pawlpui lu i ai Pawlpui otu i bangin a pa khai a nu lu i. 24Ciamanin Pawlpui khiah Khrih kuthnia ah um bangin nute in khai a pate kuthnia ah zaizongza ah um tu seh. 25Cen pate, Khrih in Pawlpui khiah it ai a nunhnak liam bangin ning nute it tuu-ih. 26Khrih in Pawlpui khiah a thu le ti thawn cianghlim le som ben fangin 27Amah hnenah Pawlpui khiah a rim le a zihbial le ciabangte um tuh lo ai cianghlim le mawhhluk tuh um tuh lo in a nunhnak liam i. 28Ciamanin pasalte in a nute khiah amahte pum bangin it mawi i. A nu ittu in amah veve it i. 29Ziangmanti fangin aisu in khai amah pum khiah hua awng lo ai a phanniu in cawm ai tuamhlawm i.
Heta ah nu (wife) in a pa (husband) zul ruai i. Ziangmanti fangin Bawi Zisu Khrih khiah Pawlpui lu (head) ai ii bangin pa te khai nu te lu i. Paul khiah pasal manin hetih in nganhnak ii lo i. Bible Hlun Genesis 2 songah hetih bang in ngan i: “7 BAWIPA Pathian in minung khiah laivut songin bawn ai a hnarkua songah nunhnak haihawh pe fangin cia minung khiah nung lio i. “ Pathian in minung hmasaber khiah pasal in bawn i. “Minung pa heh amah lek in um pha lo i. Amah thawn a phutua a bawmtu tuh bawn tuh ing,” ti in ti i. ………… Ikhalselai Adam thawn a phutua bawmtu tuh tawk lo i. 21 Ciamanin BAWIPA Pathian in minung pa khiah mitmu khaikhum in um ruai le a mitmu lakin cia pa naakruh pakhat khiah lang sah ben fangin a naak khiah sapheng thawn khuk leh i. 22 Ciafangin Pathian in minung pa hmunai a langhnak naakruh khiah nupang ah bawn ai minung pa hnenah kawih i. 23 Ciafangin minung pa in, “He heh kaimah ruh le kaimah sa i. Ciamanin nupang ti in ko tuh ing. Ziangmanti fangin amah khiah pasal songai langhnak i,” ti in ti i.
Pathian in pasal bawn hmasa ai ciaben fangin nupang khiah pasal bawmtu tuhin a naak ruh songin bawnhnak i. Pathian in nupang khiah pasal uk tu tuhin pasal lu songin bawn lo i. Cen pasal in a ke in tloh tuhin nupang khiah a ke songin khai bawn lo i. Ikhalselai it tuh le huam tuh le khakber tuhin a naak in bawn inamaw!
Ciamanin Paul in 1Kawrin 11:7-13 songah hetih in kin ngat i. “. Ikhalselai nupang khiah pasal thangphat hnak i. 8Ziangmanti fangin pasal (Adam)khiah nupang songin suak lo i. Ikhalselai nupang(Eve) khiah pasal(Adam) songin suak i. 9Pasal khiah nupang ca ai bawnhnak i lo i. Ikhalselai nupang khiah pasal ca ai bawnhnak i. Eve khiah Adam bawmtu tuhin suakhnak i. 10Ciamanin le vancung mite manin nupang in a lu vumah ukhnak hnikhnaihhnak khu pha i. 11Ikhalselai Bawipa songah nupang in pasal rinsan lo in um thill lo i. Cen pasal khai nupang rinsan lo in um thill lo i. 12Ziangmanti fangin nupang khiah pasal songin suak bangin pasal khai nupang songin tehnak i. Cen zai hmuahhmuah khiah Pathian songin suakhnak i.
Ciamanin Pathian in kin bawn fang in pasal khiah bawn hmasa ai nupang khiah pasal bawm tu tuhin pasal naakruh songin bawnhnak i. Pathian in pasal le nupang kin veksenin amah hmel bangin kin bawn manin Pathian hmai ah a camra ii sing. Inapui ai nupang ruang le pasal ruang ituseh, nupang ruat dan le pasal ruat dan tu khat lo i. Santehhnak in nupangte in fapaai thill i. Pasal in fapaai thill lo i.
Pasal khiah nupang lu ii mnin bawi ang in uk tuh tihnak ii lo i. Paul in: “23Ziangmanti fangin Khrih khiah Pawlpui lu i ai Pawlpui otu i bangin a pa khai a nu lu i.”ti in kin ngat i. Zisu Khrih khiah Pawpui lu ii ai Pawlpui Otu bangin pa te khai a nu te lu i, kin ti i. Zisu khiah Pawlpui lu ii bang a ruang pumpui Pawl khiah phanniu in sik ai tuamhlawm ai nuncak ruai bangin pa te in khai a nu te khiah phanniu in tuamhlawm in sik tuh ai cawm tuh le hnenum bangin hmang tuh lo i. Ciafangin a nu te in a pa te khiah 24Ciamanin Pawlpui khiah Khrih kuthnia ah um bangin nute in khai a pate kuthnia ah zaizongza ah um tu seh.ti in kin tiam i. Ciatih bang in bawn lesingkhaw nu te in pa te thungai le zul tuh khiah bawi manin le kih manin ii tuh lo ai a pa te in phantak niu in tuamhlawm le sik manin “nangmah naihhla” ti in grateful manin bawn tuhhnak i.
Next: pa (husband) te tavuan