ZISU THOLEH MANIN KIN HNEMPUIHNAK
– Dr. Forth Nai Sang
Pentecost – Zisu tholeh hnua ni 50 fangin Peter a hmasaber sermon pakhat lekin minung 3000 zolo Zisu khiah sang ai ohnak ngah i. Cia mi power Ciang Rauhla khiah kin Zisu kin sang sawng fangin Pa Pathian in kin pe ve ai kin songah Ciang Rauhla nai ii sing. Zisu sangtu hmuahhmuah in Ciang Rauhla nai ii sing. Adoniram Judson heh Kawlram ah 1813 fangin a nu Ann Hasseltine thawn kinte kin it ze manin Zisu thu kin rel tuh in lo hleng awng i. (A har dan a tluanthu ngan man lengkhaw ngan tum ii lai ing). Judson hleng khelleh kum 200 dawn I hang. Inapui ai kin Kawlram ah Christian te 5% dung lek um ii sing. Zaimanin kin khang thill lo i? Ziangman ii ti fangin tun kin sanah kin Christian te in Ciang Rauhla nai kin ling lo manin 95% Christiante in aisu a ompui a rualpui a innkua peu Zisu hnenah konghoi ben lo i. Kin Laimi a tam sawn tu tinim manin Christian cang vuah ii sing. Kaimah khai tinim manin Christian cang vuah awng ing. Tinim manin Christian cang vuah le kin nuncan kin ziaza tu tinim le Zisu ling lo te camra in nung ii sing. Tinim in zaikhai kin thleng lo i. Kin rim (dirt) rin ciang ben lo ai Zisu thi lek in kin ciang ruai ai thinlung thar nai thill ii sing.
Ciang Rauhla in kin uk thill hlanah Ciang Raula nai hmasa kul i. Ciang Rauhla nai tuhin Zisu kin thin songah lut ruai hmasa kul i. Ciaman Zisu na songah lut lai hlahlekhaw, na thin song ah lut ruai hmasa tu. Revelation 3:20 songah Zisu in hetih in kin ti i: “20Siktu. Dawngkham pua ah dingin dawngkham ceuh ing. I awka khiah za in dawng i hon lekhaw, cia pa songah kaimah khiah lut tuhai amah thawn rongei tuhai amah khiah kaimah thawn rongei tuh i. “ Zisu khiah na thin dawngkham pua ah ding ai na songah lut tuhin na dawngkham na ceuh i. Nangmah in na dawngkham khiah hong in lut ruai fang ian in Zisu khiah na thin songah lut tuh i. Ciamanin van le laipua bawntu le na bawntu Pathian Fapa rori na songah na bawm tuhin lut nuam i. Cia Zisu na thin songah lut tuh in zai dang khai bawn kul lo ai na thin dawngkham lek hong kul manin, tun Zisu hnenah, “Bawipa, dawng na hon ing. I songah lut tu lai I bawm tu,” ti in sawngen tu lai cia hmuah na kul i. Ciatih bang sawngen lesikhaw Zisu khiah na songah lut tuhai a Ciang Rauhla na pe tuh i.
Ilekhaw zaiman in Ciang Rauhla in kin uk kul i?
St. Paul in hetih in Efesa 5:18 songah kin ngat i: 18Capittizu thawn a hlai in zukham mah ih. Ikhalselai Ciang Rauhla thawn dim tuu-ih.” ti in kin ruai i. Kin Christiante khiah Ciang Rauhla in Pathian Fate ii si ti in tacik kin khet zo i(Efesa 1:13). Cen Efesa 4:30 song Ciang Rauhla khiah lungsia ruai mah ih ti in kin tia i. Tun Efesa 5:18 songah Ciang Rauhla thawn kin dim ruai i. Ciaheh ana command kin ruaihnak i. Ciamanin Ciang Rauhla thawn kin dim lo fangin Pathian ruaihnak command ngai lo manin kin sual i. Ciang Rauhla thawn kin dim lekhaw kinmah khai Ciang Rauhla power in ciang kin hlim tuh ve i.
Lai Cianghlim in zai kin rel ii ti fangin zu kham mah ih. Zaiman in? Zukham te I phathnak pakhat khai bawn lo i. Pong tuh lo lo pong, sualhnak a phun cangcang bawn i. Inapui Ciang Rauhla thawn kin dim fangin kin nundan khiah kontih bang ii tuh i? 1. Pakhat le pakhat lasa in pawldun kin hiam tuh i. 2. Ciang Rauhla thawn kin dim fangin pumkhawm in Pathian bia tuh ii sing(worship). 3. Zisu hming in kin Pa Pathian khiah zaizongza kin pe manin an tuh ii sing. Ciang Rauhla thawn kin dim lo fangin a cam(complain) le thinraw li in um tuh ii sing. Ciang Rauhla thawn kin dim fang tu, Aw Pathian khua khai hmu lai, khua khai za lai, hai khai hawh ben, vak khai vak ben ti bangin Pathian an tuh le kin thin khai kin nuam tuh hiar i. 4. Ciang Rauhla thawn kin dim fangin pakhat le pakhat zul dun in upat dun tuh ii sing. Ciafangin kin rem tlang tuh ii lo im? Kin rem thill lohnak tu iksik dun le nautat dun le zauhsuam dun manin ii lo im? Ciang Rauhla thawn kin dim fangu, Aisu in i bawn i? I naihhnak le fimhnak te heh akonin ngah ing? I nuu songin ii te fangin laivumah ii kenghnak zai um ii cang? Kawngkolh in ii te ii ta lo im?ti in ruat hal tuh le thin kin neem tuh i.
Aw ulenaute, zaitluk in Ciang Rauhla ai kin dim tuh khiah kul ze i? Ciamanin hetih bangin sawngen tulai Ciang Rauhla thawn na dim tuh i.
Cialekhaw na sualhnak phuang (confess) tu. 9Kinte in kin sualhnak khiah phuang lesingkhaw, amah khiah sangtlak le dikcang pa i manin kin sualhnak khiah kin hlat sah tuhai kin dikcang lohnak hmuahhmuah kin somsah tuh i. 1 John 1:9 Ciaben fangin hetih bangin swngen tulai Ciang Rauhla thawn na dim tuh i.
“Pa Pathian, kaimah veve khiah uk ngio manin na hmai ah ii sual te i. Zisu khiah ii sualhnak ca in thinglamteh vumah thi manin ii sualhnak khiah ii hlat sah zo manin na an ing. Ciamanin tunin nangmah in ii ruai bangin na Ciang Rauhla thawn ii dim in ii uk tu. Amen”
Hetih bangin sang ngai ngai in sawngen tulai a hman le hman lo tu ningmah in ling tuh ii si. Sang ngai ngai in ngen lesikhaw na ngenhnak bangin Pathian in na pe tuh ai Ciang Rauhla thawn na dim tuh le na nunhnak khiah tumce tuh i. Cen haihawh khai sun le zan hawh kul bangin rauhla haihawh khai sual ngah caang fangin rauhla haihawh tuh ii sing. Kin sualhnak phuang tuh le Ciang Rauhla thawn kin dim tuhin sawngen tio nga sing. Amen
info