Tlawngkainithum nia ah Israel in van lam an roh ngaiin kaap le Hamas Islamist pawlkom te in laivum ah Israel om ve daih lo te pawl ai konghoitu pakhat reek ngah lio hang ii.
Jewish miphun ram in tun heh van lam an vai 950 Palestinian ramri tipui kap dung ah kaap zo ai a hlaice in ralkap te ai hmun poimawh, inn le ralthuam dahhmun te pawl bat ii.
Nipui nia ah khai Israel lam in lawng hmangin tipui an kaap thai te pawl heh van lam in kaap dek zo ii. Van lam in a kaaphnak te lakah Gaza khuapui ai office poimawh te pawl le Arab lam thuthang phuanghnak hmun poimawh te pawl tel ai Qud television ai thuphuangthu mi 3 in hliam tuar zo ii.
Nisuak hlan ah Jabalya refugee camp hiang ah kaaphnak in naupang 1 thi ai mi 12 hiam tuar ti ii.
Hetih teng ah Hamas lam hotu lam in Israel a lau lo thu le reelsiathnak te pong hlen ai, “Tun heh Zionist te tawnghnak a hnuataber i loin a hampanhnak ian i lai,” ti ngio ii.
Israel vanzuang te pawl in Canizia ah a bomb hnak in inn tam ngai hnawmcan ai cia te songin Prime Minister Ismail Haniyeh ai office le palik (Police) headquarters te khai tel ii.
Tun tum heh Palestinian te lam in a vaikhathnak rocket hmangin Jerusalem khuapui a kaap baanhnak i ai Tel Aviv khuapui khai kaap baan hang maanin Israel in naupang tlawng te pawl khai ni zaimawzah dung khaam ruai ii.
Israel ai missile khamhnak ralthuam (Iron Dome) hmangin Gaza lam in Tel Aviv kaaphnak rocket te pawl heh hnawmcan ruai ben napui Tel Aviv hiang ai mipui te tipui hiang ah hiam ngaiin bawhlung sal teng lai ah rocket hleng ai puak hnua tu roh ngaiin ralring beet ii.
Hamas lam in Tlawngkainithumnia Tel Aviv ah rocket puakhnak heh amah te kaaphnak tiin phuang ii. He rocket heh Iran in bawnhnak Fajr-5 ii ai kilometer 70 (43 miles) tian hleng ben tiin phuang ii.
Israel in raal a tawnghnak thula maan Western ram te pawl khai rolh ve ai U.S le European hotu te pawl in Israel in amah ram ca humhim thilhnak covo nai ve tiin phuang ii.
British Prime Minister David Cameron in, “Khatlam le khatlam ah siathnak le mipui in harsahnak tam ngai a tawk tuh heh thupui ngaiin ruat,” tiin Israel Prime Minister Benjamin Netanyahu thawn tawk dun fangin pong ii. United Kingdom in cang thil tawpin ram pahnih in a niam lam sawn in fehpui in buaihnak heh com ruai tuhin daihsah thu Cameran in Netanyahu hnen ah reel ii.
President Barrack Obama ai deputy national security adviser Ben Rhodes in U.S tun buaihnak heh niam zianzo in, tawkdun in reltlang tuhin daihsah thu reel napui Israel lam in amah te ram ca humhimhnak heh a lungkhim thu reel ii.
Egyptian President Mohamed Mursi in Cairo ah Hamas hotu te thawn tawkdun tum ai remhnak bawn thilhnak om napui rel ngam lai lo ti ii. Tun naai niu ah Egypt in Israel le Hamas karlak ah palai per in remhnak bawn tum awng ii.
Palestinian lam upa lam in Cairo ah Nipuinia ah tawkdun tuh ai remhnak bawn thilhnak thula om tiin reel napui cia thu reel tuhin tun heh a hma ze rih ti ii.
Jerusalem ah, Israel hotu in Hamas lam thawn tawkdun a hiam lo thu phuang ii. Ralkap commanders in Israel in Gaza lam an rocket te pawl kham tuhin ralring liang thu reel ai 2000 kum dung pah Israel khua tam ngai he te pawl in hnawmcan zo thu te reel ii.
UNO ai Gen Secy Ban Ki-moon heh hmai zarh song ah Israel le Egypt tlawm tum ai he buaihnak heh com ruai tuhin nor tum teng ii.
Israel lam in tank le ralkap te pawl heh ralring liang in kuul caan ah laihnia lam in Gaza tawng tuhin om cia ii. Tlawngkainiruknia ah Israel lam in laihnia lam in tawng tuhin ralkap 75,000 le ralkap 16,000 te pawl a kuul caan ah ko vut tuhin ralring ii.
Israel lam in tumtahhnak nai cia ai ni 1 maw ni 2 khai rai tuh lo ti ii. Tun tian tawngdunhnak ah Israel lam in hlawhtling hlen ai Libya, Sudan le Iran lam in Hamas te bawmhnak hmun poimawh 1,000 dung heh kaap tuhin ralring ti ii.
Hamas vanzuang te pawl in Israel heh neh de lo ii. A hnuata ber zarh-3 song Gaza ah tawngdunhnak 2008-9 kum karlak ai tawngdunhnak ah Palestinian mi 1,400 thi awng ai, a tam sawn tu mipui ii. Cia tawngdunhnak ah Israel lam im mi 13 thi awng ii.
Gaza thubuai heh Arab ram din tumhnak thula thawn pehzom in le Syria ram song ai buaihnak te thawn kum 2 song ah so te te ii.
Tun naai ai Egypt ram election ah Hamas thawn naperpui in nehhnak co hnak heh Israel thawn cia te karlak heh roh ngaiin hnawm ruai ii. Israel le Egypt in 1979 kum ah remhnak laai ngaan tlang awng ii.
info