Zarhkhat song Israel leh Hamas te ben thil ngal lo tawngdunhnak comruai tuh leh rualrem ruaituhhnak ca Obama in Clinton heh Israel leh Gaza hmunte ah hlat ii.
Tun tengah Israel leh Hamas te heh roh ngai in nawr dun li teng i ai, Laivum pui in zaikomah Israel in Hamas te um hmun heh Lai ralkap hmangin tawng ni maw ti hnak hlir li teng ii. Rocket leh motar te thawn tawngdun li tengah Gaza hmunah miten Hamas leh Gaza mi thi te heh phum pah tho tho ai, Israel lam te in khai Gaza lam in kawihnak rockets te lakan ralring kul ngio pah lai ii.
UN Chief Ban Ki-moon khai Egypt ah um teng ai, Israel leh Hamas te tawngdunlihnak heh com vual kul thu leh rai tete le khaw Mideast hmun ah ralpui tho thai thu khai phuang ii. Clinton heh Obama thawn Cambodia tlawn teng napui, 20 Nov ah Cambodia in Israel ram lam pan ai, Israel Prime Minister Benjamin Netanyahu thawn tawk dun tuh ii.
US acozah in Hamas te, Israel miten bomb te leh phuncang hmang ai rek tute heh terrorist te ii tin pom ai, rualremhnak thu sawmduntuhhnak ah khai tawk tuh lo ii. Washington in tunai buaihnak heh Hamas ten Israel ram songah rocket kaphnak thu man panhnak i thu leh Israel te in amahte ram humhim tuhhnak ca merve thilhnak khai heh amahte ai covo ii tin phuang ii.
20 Nov tian Palestian mite 115 thizo ai, 54 te heh mipui te ii. Israel in Gaza hmun heh vanzuang in vai 1500 zo lo kap hang ii. Gaza hmun an rockets 1000 val Israel ram song ah kap zo napui, US acozah bawmhnak thawn a bawnhnak rocket defence system man tun tian mipui ten roh ngai in tuar lo hnak ii.
Netanyahu in “Ram pahnihte tawkdun ai thurel tlang hnak thawn rualremhnak um tuh heh i daihhnak ber ii. Inapui khalkhaw Hamas te lam in comnia um lo ai kin tawng mengmo le khaw, vanlam lek ilo lailam in ralkap thawn tawngtuh in khai ralring cia lep ii sing.” tin thu phuang ii.
Israel ram a ding ngawm pahin Hamas te thawn buaihnak heh tun tian bo thil lai lo ii.
info